Zyrtari i Ministrisë së Industrisë, Ndërmarrësisë dhe Tregtisë, Irfan Lipovica, sot përfundoi në pranga bashkë me kolegun e tij, Hafiz Gara. Arrestimi i tyre erdhi pas një aksioni të Policisë së Kosovës në koordinim me Prokurorinë Speciale të Republikës së Kosovës, nën dyshimet për keqpërdorime me rezervat shtetërore, raporton Gazeta Sinjali.
E Lipovica si duke është një ndër të përkëdhelurit e shefes së këtij dikasteri. Rozeta Hajdari e cila udhëheq me MINT-in, kishte favorizuar Lipovicën duke ia ndarë 12 mijë euro për shkollim të nivelit master në RIT Kosova (AUK), i cili është i vetmi institucion në vend që lëshon diploma amerikane.
Siç raportonte Periskopi vitin e shkuar, paratë e ndara për shkollimin e Lipovicës që atëherë mbante pozitën e sekretarit,, nuk janë të ndonjë fondi për ngritjen e kuadrove profesionale të Ministrisë, por të projekti CERP – për të cilin projekt Qeveria ka marrë kredi për të përkrahur bizneset prodhuese.
“Sekretarit i është aprovuar nga ministrja Rozeta Hajdari një trajnim në fund të vitit të kaluar, mirëpo ky trajnim ka rezultuar se ishte shkollimi Master në RIK-AUK dhe për të cilin shkollim është bërë kontrata nga MINT me fakultetin RIT-AUK në vlerë 12.000 euro dhe këto mjete janë paguar nga projekti CERP për të cilin projekt Qeveria ka marr kredi për të përkrahur bizneset prodhuese. Kësti i parë i pagesës në vlerë prej 4000 euro është paguar nga projekti për shkollimin master”, kishte bërë të ditur burimi brenda MINT-it.
Lipovica ishte deklaruar shkurt për këtë çështje, duke thënë se ‘nuk është bash qashtu’.
Zyrtarët e lartë publik janë të detyruar që të bëjnë deklarimin e pasurisë në Agjencinë Kundër Korrupsionit.
Nga pozita e sekretarit, Lipovica në deklarimin e pasurisë më 23.03.2021, te rubrika “detyrimet financiare ndaj personave juridik dhe fizik”, pati shkruar se ka detyrime në vlerë prej 12 mijë eurove ndaj RIT Kosova.
Qëllimi i detyrimit është shënuar që janë studimet me kohëzgjatje deri në fund të vitit 2021. Ky detyrim nuk ekziston në formularin e vitit 2020.
Me të ardhur në krye të MTI-së në vitin 2011, Mimoza Kusari -Lila e kishte emëruar Irfan Lipovicën si Drejtor të Departamentit të Turizmit.
Këtë pozitë e ka mbajtur prej 2011-tës deri në vitin 2020.
Postin e ministres së Tregtisë dhe Industrisë, Rozeta Hajdari e kishe marrë në vitin 2020 në Qeverinë Kuri -I dhe Lipovicën e kishte emëruar menjëherë U.D të Sekretarit e më pas Zëvendesues të Sekretarit të Përgjithshëm.
Lipovica u shkarkua nga pozita e Sekretarit të Përgjithshëm në MINT në maj të këtij viti dhe i njëjti u kthye në pozitën që ka pasur më herët, si shef i Departamentit të Integrimeve Evropiane.
Projekti CERP
Implementimi i Projekti CERP, nga i cili i janë paguar studimet Lipovicës, ka nisur në dhjetor të vitit 2018, për të cilin ishte thënë se ka një afat kohorë prej 5 viteve. Pra deri në dhjetor 2023.
MINT është përgjegjëse për Implementimin e Projektit të Konkurueshmerisë dhe Gatishmërisë për Eksport (CERP), 14,3 milionë euro, i financuar me hua – kredi të butë nga Banka Botërore. Qëllimi i projektit CERP është të mbështesë certifikimin e produkteve për tregjet e eksportit, të forcojë kapacitetin e Bizneseve të orientuara kah eksporti, dhe të përmirësojë Konkurrueshmërinë e tyre. Më pas, projekti është ristrukturuar për t’iu përgjigjur nevojave në ndryshim të NMVM-ve, si rezultat i situatës së krijuar me COVID-19.
Projekti CERP përbëhet nga dy komponente: Nën komponenti 1.1: Mbështetja e Ndërmarrjeve Mikro, të Vogla dhe të Mesme (NMVM) për të përmirësuar Konkurrueshmërinë dhe gatishmërinë për eksport (10,4 milionë euro) nëpër mes Programit të Granteve të Përputhshme (PGP)./Sinjali