Ministri i Shëndetësisë Arben Vitia ka thënë se sipas raporteve ditore sot më shumë ka pasur lirime të pacientëve nga klinikat COVID sesa pranime.
Ai në një konferencë për media, ditën e sotme e ka konsideruar shumë të rëndë për Kosovën pasi kanë humbur jetën 26 pacientë, prej tyre 6 të vaksinuar, por që kanë qenë me sëmundje shoqëruese.
“Edhe sot ishte një ditë shumë e rëndë për Kosovë ku vetëm 26 qytetarë kanë humbur jetën në përballje me pandeminë COVID-19. Janë gjashtë pacientë, të cilët kanë qenë të vaksinuar, por nuk është e specifikuar me një apo dy doza… Mirëpo të gjithë me sëmundje shoqëruese”, theksoi Vitia.
Ministri Vitia ka thënë se fokusimi i tij është vetëm në pandeminë COVID-19 dhe jo në garën për kryetarin e Prishtinës në zgjedhjet e 17 tetorit. Sipas tij, pandemia do të jetë fokusimi kryesor derisa të zëvendësohet nga Zyra e Kryeministrit me një ministër tjetër.
“Jam i njëjti Arben Vitia, por jam në kohë të ndryshme dhe unë nuk kam folur dhe as postuar, as edhe njëherë për garën time si kryetar i kryeqytetit. Në asnjë moment unë nuk kam bërë asnjë sekondë fushatë siç jeni edhe ju dëshmitar dhe i gjithë koncentrimi im është vetëm ministria e Shëndetësisë dhe luftimi i pandemisë. Ne po përballemi me një variant siç thash jashtëzakonisht të rrezikshëm siç është delta, prandaj jam i fokusuar 100 % me këtë temë dhe kjo në fakt është hera e parë që po e zgjas kaq shumë, por do të jetë dhe hera e fundit që do të flas për garën zgjedhore natyrisht derisa kryeministri do të vendosë të më zëvendësoj”, tha Vitia.
Duke e quajtur lajm të mirë që sot ka pasur më shumë lëshime se sa pranime në spitale të pacientëve me COVID, Vitia tha se tashmë kanë përgatitur edhe skenar për zgjerim të kapaciteteve edhe në Kujdesin Parësor Shëndetësor, por edhe mundësinë e krijimit të spitaleve të improvizuara në hapësira fushore.
Ai tha se në këto hapësira do të trajtohen kryesisht pacientët me gjendje më të lehtë shëndetësore ku do kenë mundësinë të marrin vetëm terapinë ditore.
“Është lajm i mirë që sot pas një kohe nga filloi ky eksplozion i virusit, sot ka pasur më shumë lëshime sesa pranime të pacientëve me COVID. Kjo na gëzon pa masë në anën tjetër ka disa ditë mos të them 1 apo 2 javë ku janë duke u përgatitur të gjitha skenarët. SHSKUK është duke punuar në zgjerimin e kapaciteteve në spitalet tona. Dje është mbajtur një takim në MSH për diskutimin e këtyre skenarëve për rritjen e kapaciteteve në shërbimin primar shëndetësor dhe natyrisht edhe skenarët tjera, të cilat shpresojmë që nuk do të ndodhin që të organizojmë edhe spitale ose të karakterit fushor ose të një të grumbullimi të qytetarëve në këto spitale të improvizuara, ku do të qëndrojnë pacientët për ta marrë terapinë ditore pacientët me simptoma të lehta… Është bërë plani operativ dhe i kostuar për nivelet e KPSH-së që të rriten kapacitet për trajtimin e pacientëve nëpër KPSH fillimisht me terapi ditore, ku pacientët të mos marrin terapinë në shtëpi dhe nëse është nevoja dhe ku ka mundësi të shtohen shtretër edhe për hospitalizim… Oksigjeni do të bëhet me boza të oksigjenit dhe siç e përmenda në fillim, ideja është që në Kujdesin Parësor Shëndetësor të trajtohen pacientët me simptoma të lehta dhe jo simptoma të rënda”, tha Vitia.
Vitia njoftoi se deri në fund të kësaj jave pritet të arrijnë edhe 150 mijë doza të tjera AstraZeneca, dhe mbi 450 mijë vaksina Pfizer donacion nga SHBA, teksa ka paralajmëruar se gjatë shtatorit do të ketë vaksinime edhe gjatë të dielave.
“Deri në fund të javës pritet të arrijnë edhe 150 mijë doza të tjera AstraZeneca nga Gjermania. Sot ka vazhduar furnizimi me barna dhe materiale mjekësor për Kujdesin Parësor Shëndetësor… Në tremujorin e tretë në të cilin gjendemi, sipas kontratës me Pfizer në total do të vijnë 622 mijë vaksina. Një pjesë tanimë ka arritur gjatë korrikut dhe gushtit. Po ashtu janë gjeneruar terminë të ri të aplikimit në përputhje me furnizimet nga kjo kontratë. Së shpejti presim furnizimin edhe arritjen e mbi 450 mijë dozave të Pfizer nga COVAX pjesë e donacionit nga SHBA-të. Mbi 400 mijë vaksina janë administruar në Kosovë vetëm gjatë një muaji që në përqindje për kokë banori ne kemi tejkaluar pothuajse të gjitha vendet e rajonit në këto ritme të vaksinimit edhe në kohën kur këto vende kanë pasur pikun e vaksinimit. Me arritjen e dozave shtesë AstraZeneca nga Gjermania dhe me arritjen e dozave nga COVAX, pjesë e donacionit shtesë nga SHBA, por edhe me arritjen javore të sloteve nga kompania Pfizer, muaji shtator do të jetë shumë komod sa i përket stoqeve të vaksinimit dhe natyrisht përveç se do të shtohen kapaciteti i vaksinimit me ekipe natyrisht se do bëhet edhe e diela siç është bërë edhe e shtuna si ditë vaksinimi”, tha ai.
Kreu i shëndetësisë, Arben Vitia tha se po punojnë në drejtim të digjitalizimit të certifikatës së vaksinimit me qëllim që të njihet nga të gjitha shtetet.
“Ne sa i përket certifikatës së vaksinimit ka një 1 javë që punojmë me ASHI-në digjitalizimin e certifikatës së vaksinimit konform kërkesave të BE-së dhe besojmë shumë shpejt kjo certifikatë do të jetë e digjitalizuar duke plotësuar të gjitha këto kritere do të njihet nga të gjitha shtetet”, tha ai.
Lidhur me mos pjesëmarrjen e kryetarëve të komunave në takimin me kryeministrin Albin Kurti, ministri Vitia i cili ishte në këtë takim, tha se është koha për bashkëpunim në luftimin e pandemisë dhe në situata të tilla emergjente duhet të lihen anash ndasitë politike.
Sipas tij, sot pritet publikimi i listave edhe të 1 mijë mjekë të rinj që do t’u bashkohen mantel-bardhëve për të luftuar COVID-19 në spitalet në Kosovë.
Gjatë 24 orëve të fundit, janë shënuar 26 raste të vdekjes, ndërsa pozitiv me koronavirus kanë rezultuar 1.383 qytetarë të Kosovës.