Përdorimi i substancave narkotike ka marrë përmasa shqetësuese në Kosovë. Ato po përdoren me të madhe, sidomos nga të rinjtë të cilët shpesh kapen në flagrancë nga Policia. Një rast i tillë ka ndodhur së fundi edhe në Prishtinë, raporton Gazeta Sinjali.
Sinjali mëson se një patrullë e Policisë kanë ndaluar dhe kontrolluar një person në rrugën ‘UÇK’ në Prishtinë, nën dyshimet për gjësende të kundërligjshme, me ç’rast zyrtarët policorë ia kanë gjetur të riut një sasi të substancës së dyshuar narkotike, të llojit marihuanë.
Marihuana është konfiskuar, ndërsa i dyshuari është arrestuar dhe është shoqëruar në stacion policor për intervistim.
Me urdhër të prokurorit, ndaj 23-vjeçarit është iniciuar rasti ‘Posedim i paautorizuar i substancave narkotike, psikotrope ose analoge’.
Sipas Kodit Penal të Kosovës, është e jashtëligjshme që qytetarët të blejnë, posedojnë apo shpërndajnë substanca narkotike dhe mund të dënohen me gjobë apo burgim, varësisht nga sasia dhe lloji i lëndës narkotike që iu kapet nga autoritetet e rendit.