Tregjet në kryeqytet janë jashtë standardeve normale. Ato funksionojnë pa infrastrukturë e pa kushte higjienike, derisa produktet shiten të ekspozuara nga pluhuri e nga reshjet e shiut e borës.
Tregu Gjelbër dhe ai i Ulpianës në Prishtinë, edhe pse ndodhen në qendër të qytetit e shumë pranë institucioneve kryesore, vazhdojnë të jenë në gjendje jo të mirë.Prej vitesh këto tregje janë pa infrastrukturë e pa kushte higjienike.Çatitë janë të improvizuara me letra e copa materialesh, e produktet shiten të ekspozuara nga pluhuri e nga reshjet e shiut e borës.Ndërsa jashtë, e gjithë rruga është pothuajse e bllokuar nga shitësit ambulantë.
Tregtarët brenda tregut thonë se po punojnë me shumë vështirësi, pavarësisht se paguajnë detyrimet.
Ndërkohë në një përgjigje elektronike Komuna e Prishtinës ka njoftuar se ka filluar me procedura për të transferuar Ndërmarrjen Shoqërore “Tregu” në Ndërmarrje Publike Lokale “Tregu”, i cili proces do të mundësojë që tregjet e Prishtinës të menaxhohen nga Komuna e Prishtinës, përmes ndërmarrjes lokale.
“Tregu i Gjelbër i Prishtinës do të rindërtohet, dhe do t’i plotësojë të gjitha standardet. Aktualisht ky treg është në gjendje të papranueshme. Kemi zhvilluar disa takime me tregtarët, me të cilët po diskutojmë disa zgjidhje të përkohshme, deri sa të përfundohet projekti final.Shitësit ambulant, sikurse edhe të tjerët do të përfshihen nën ombrellën e tregut dhe do të bëhen pjesë e tij”, thuhet në përgjigjen e Komunës së Prishtinës.
Për më shumë ndiqni kronikën e plotë: