Nesër, në Gjykatën Themelore në Gjilan do të bëhet shpallja e aktgjykimit për rastin tragjik që ndodhi në qershor të vitit të kaluar, në një kafene të Gjilanit, ku Bardhyl Zeqiri po akuzohet se ka therur për vdekje Ismajl Canin, pas një mosmarrëveshje verbale. Aktgjykimi do të shpallet në orën 13:00, ka bërë të ditur zëdhënësi i Gjykatës, Sabit Shkodra, raporton Gazeta Sinjali.
Bardhyl Zeqiri po akuzohet nga Prokuroria për veprën penale “vrasje e rëndë”, pasi më 24 qershor, në kafeterinë “Viva La”, me dashje ka privuar nga jeta viktimën Ismajl Canin për motive të ulëta.
Gazeta Sinjali muaj më parë ka publikuar detaje ekskluzive nga aktakuza e ngritur ndaj Zeqirit. E gjithë kjo ngjarje tragjike që tronditi vendin atë ditë, dyshohet se ndodhi për shkak të lidhjes intime që i dyshuari Zeqiri kishte pasur me gruan e tani të ndjerit Ismajl Canit. Pas një takimi që patën në kafene, Zeqiri theri me thikë Canin, duke ia shkaktuar katër plagë prerëse dhe dy shpuese. Sipas raportit të autopsisë, vdekja e Ismajl Canit ka qenë e dhunshme dhe ka ardhur si rrjedhojë e shokut hemorragjik, si pasojë e gjakderdhjes së jashtme.
Çka ndodhi atë ditë dhe si përfundoi tragjikisht debati që patën i dyshuari dhe viktima?
Bardhyl Zeqiri ka deklaruar në Polici se para se të ndodhte ngjarja tragjike, rreth orës 11:30, e kishte telefonuar viktima Ismajl Cani, i cili, sipas tij, i kishte kërkuar të takoheshin dhe të flisnin për marrëdhënien që Bardhyli kishte pasur me gruan e tij, shkruan Gazeta Sinjali.
Në deklaratën e Zeqirit thuhet se kur ai ka shkuar në kafene, aty e kishte gjetur Ismajlin duke pirë birrë, i cili më pas, sipas tij, i ka thënë se “ty nuk të bëj gjë, mirëpo do t’i vras ata që do të djegin më së shumti. Po shkoj po ta përdhunoj gruan në shpi, kam me ta vra djalin dhe pasi ta q** gruan, edhe grujen ka me vra, edhe ti nashta pshton”.
Pas këtyre fjalëve, Bardhyli ka deklaruar se ia ka kthyer Ismajlit, duke i thënë “pushka top tu boft Ismajl”. Në ato momente sipas Bardhylit, Ismajli e ka kapur për veshi atë dhe i ka thënë se “tash e marr alltinë dhe të vras”, duke e goditur, sipas tij, me shishen e birrës të cilën Ismajli e kishte në dorë. Bardhyli tutje ka thënë se fytyra i ishte mbuluar me gjak nga goditjet dhe ishte larguar nga tavolina ku ishte.
Situata në atë moment kishte eskaluar, kur Bardhyli kishte marrë briskun dhe i ishte drejtuar Ismajlit me fjalët: “Qekjo është besa jote a, une erdha me fol si njeri me ty”. Ndërsa Ismajli, sipas Bardhylit, ia ka kthyer duke i thënë se “tash po i thirri vëllezërit, e me shku me ta vra djalin”. Pas këtyre fjalëve, ndodhi edhe tragjedia. Bardhyli dyshohet se e theri për vdekje Ismajlin, në qaf e gjoks.
Detaje të tjera tronditëse nga ky rast i gjeni edhe në linkun e mëposhtëm.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.