Teksti përfundimtar i raportit për Serbinë në formë rezolute, pritet të miratohet të mërkurën e 6 korrikut në seancën plenare të Parlamentit Evropian në Strasburg, dhe kjo është hera e parë që zyrtarisht përmendet njohja e ndërsjellë mes Kosovës dhe Serbisë.
Krahas rezolutës për Serbinë, Parlamenti Evropian pritet ta miratojë edhe rezolutën për Kosovën.
Kështu njoftuan raportuesi për Serbinë, deputeti Vladimir Bilcik nga Partia Popullore Evropiane dhe raportuesja për Kosovën, Viola von Kramon, deputete e Partisë së Gjelbër gjatë një konference për media në Strasburg.
Një pjesë e fjalisë në projekt-rezolutën e cila i bën thirrje Serbisë dhe Kosovës të arrijnë një marrëveshje për normalizimin e marrëdhënieve “bazuar në njohjen reciproke”, është shtuar përmes një amendamenti të paraqitur nga Lukas Mandl, anëtar i Partisë Popullore Evropiane.
Mes tjerash në rezolutë u kërkohet “autoriteteve serbe të angazhohen realisht në reformat e nevojshme dhe ta kthejnë vendin në rrugën e duhur të integrimit evropian, duke përmbushur kështu aspiratat evropiane të Serbisë”.
Në fokus të raportit për Serbinë këtë vit, Parlamenti Evropian i bëri thirrje Beogradit që “urgjentisht” të harmonizohet me sanksionet e vendosura nga BE kundër Rusisë dhe Bjellorusisë dhe e vendosi atë si një nga kushtet për përparimin e mëtejshëm të Serbisë në rrugën e duhur. drejt integrimit evropian.
/Albanianpost.com