Shefi i Grupit Parlament të PDK-së, Abelard Tahiri, e ka cilësuar si skandal të madh përfshirjen e ambasadorit të Kosovës në Kroaci, Martin Berishaj, në aferën e shpëlarjes së parave.
Në një konferencë për medie, ai ka thënë se kjo afërë dëshmon se ambasadori Berisha është punëtor i një kompanie serbe.
“Kjo nxjerr në pah që ambasadori ynë që shërben në Kroaci, që në qeverinë Kurti 1 ishte edhe këshilltar i kryeministri Kurti, tashmë është një punëtor apo këshilltar i një kompanie energjetike me bazë në Serbi, kompania GEN, që sipas raportimeve të deritanishme e ka paguar ambasadorin tonë rreth 600 mijë euro”, ka thënë Tahiri.
Ai ka treguar se kjo kompani serbe i ka shitur Kosovës energji elektrike.
“Del në pah që kjo komani gjatë periudhës dyvjeçare, kur në KEK është vendosur një menaxhment i ri nga Qeveria Kurti 1, kanë bashkëpunuar me këto kompani. Kjo kompani, pra kompania GEN, dega e saj në Serbi, i ka shitur Kosovës energji elektrike dhe po ashtu ka blerë energji nga Kosova. Kjo është jashtëzakonisht skandaloze”, ka thënë Tahiri, duke shtuar se ambasadori Berisha është një sekser.
“Pra, ambasadori ynë shërben si sekser në mes të kryeministrit tonë dhe mafies serbe energjetike, e cila me ngulm pengon themelimin e komisionit hetimor për krizën energjetike”, ka thënë Tahiri, duke treguar se pse LV-ja po e bllokon themelimin e këtij komisioni.
“Ne e shohim që arsyeja e vërtetë e bllokimit të hetimit parlamentar për të hetuar çdo transaksion të shpenzimit të taksave të qytetarëve. Këtë proces po e shoqëron një jotransparencë. Prandaj duam ta shohim se cili ka qenë roli i sekserit të kryeministrit Albin Kurtit, Martin Berishaj, në procesin e shitblerjes së energjisë elektrike në Kosovë, si ka ndërmjetësuar ky me mafien serbe dhe kompanitë që veprojnë në Serbi”, ka thënë Tahiri./Nacionale