Prokuroria Themelore në Mitrovicë, Departamenti i Krimeve të Rënda ka kërkuar nga Gjykata Themelore caktimin e masës së paraburgimit për njërin nga të dyshuarit, që u përfshi në sulmin ndaj zyrtarëve policor që ndodhi të shtunën në fshatin Jashanicë të komunës së Leposaviqit, raporton Gazeta Sinjali.
Këtë e ka bërë të ditur Prokuroria përmes një komunikate për media, ku bëhet e ditur se ekziston dyshimi i bazuar se i dyshuari A.D., me datë 16 korrik në fshatin Llazhin të komunës së Leposaviqit, me vullnet dhe vetëdije ka ndërmarrë veprime me të cilat ka rrezikuar jetën e katër zyrtarëve policorë.
“Sipas kërkesës së prokurorisë të dorëzuar në gjykatë, ekziston dyshimi i bazuar se i dyshuari A.D., me datë 16 korrik 2022 në fshatin Llazhin të komunës së Leposaviqit, me vullnet dhe vetëdije ka ndërmarrë veprime me të cilat ka rrezikuar jetën e katër zyrtarëve policorë të njësisë NJKNSH të Drejtorisë së Policisë Kufitare“, thuhet në komunikatë.
Seanca për caktimin e paraburgimit për të ndaluarin A.D., pritet të mbahet para gjyqtarit të procedurës paraprake të Gjykatës Themelore në Mitrovicë.
Ndërsa i dyshuari i dytë me inicialet U.R., dyshohet se e ka lehtësuar rrugëtimin dhe ka luajtur rolin e personit i cili e ka njoftuar të dyshuarin A.D., për çdo pengesë të mundshme në rrugë, me çka ka rrezikuar dhe penguar zyrtarët policorë, e që është në hetim e sipër.
Shënim: Personat e apostrofuar në këtë artikull prezumohen të pafajshëm derisa fajësia e tyre të mos provohet me vendim të formës së prerë nga gjykata./Sinjali