Kandidati për kryeministër nga radhët e Lëvizjes Vetëvendosje Albin Kurti ka reaguar pas sulmit fizik ndaj djalit të ish-ministrit Nenad Rashiq.
Kurti në një postim në Facebook ka thënë se krim banditesk ndaj Nikolla Rashiqit është i organizuar dhe ka të bëjë me prindin e tij që nuk u thye e as s’u nënshtrua ndaj trysnisë e kërcënimeve të Serbisë.
Ai me këtë rast ka kërkuar nga organet e rendit që urgjentisht ta zbardhin rastin dhe autorët të përgjigjen para drejtësisë.
Postimi i plotë:
Me keqardhje të madhe morëm lajmin se sot në Graçanicë, djaloshi 18 vjeçar, Nikolla Rashiq, u rrah brutalisht me armë të ftohta. Nikolla është i biri i Nenad Rashiqit, politikanit demokrat e të mirënjohur serb në Kosovë.
Duket se ky krim banditesk ndaj Nikolla Rashiqit është i organizuar dhe ka të bëjë me prindin e tij që nuk u thye e as s’u nënshtrua ndaj trysnisë e kërcënimeve të Serbisë. Me gjasë, meqë nuk e frikësuan dot Nenad Rashiqin, ia rrahën të birin Nikollën.
Në qeverinë tonë të re do të punojmë që të gjithë qytetarët e Kosovës pa dallim përkatësie kombëtare të jetojnë të sigurt.
Kërkoj që organet e rendit urgjentisht ta zbardhin këtë rast dhe kriminelët të përgjigjen para drejtësisë, ndërkaq Nikollës i uroj shërim të plotë e të shpejtë.
Ndryshe, Policia e Kosovës ka arrestuar sot tetë persona, në mesin e tyre edhe një të mitur për sulm ndaj djalit të Nenad Rashiq. Incidenti është dënuar ashpër edhe nga ambasadori i Britanisë së Madhe në Prishtinë, Nicholas Abbott/KosovaPress