Gjatë kohës kur ka qënë udhëheqësi kryesor i opozitës, Albin Kurti e kishte mbajtur një fjalim të sertë në Kuvendin e Kosovës, ku fliste për vëllezërit Devolli. Tash, Kurti dhe varësit e tij, nuk po e lëshojnë asnjë mundësi pa e përmendur rritjen e eksportit të Kosovës gjatë mandatit të tyre. Kjo rritje është e bazuar ekskluzivisht në rritjen e eksportit dhe suksesin e jashtëzakonshëm në tregjet ndërkombëtare të dyshekëve Comodita, pronar i të cilës është Shkëlqim Devolli. Mirëpo Kurti nuk po e përmend këtë fakt.
Pasurimi i shpejtë dhe përtej imagjinatës duhet të hetohet e jo të shpjegohet – thoshin kriteret e dikurshme të Kurtit, derisa nuk ishte në pushtet.
E tash kur në dorë e ka krejt pushtetin, Kurti po e trajton me mburrje suksesin e kësaj kompanie, si sukses të Kosovës. Kurti dhe varësit e tij nuk e lëshojnë asnjë rast pa e përmendur rritjen e eksportit të Kosovës, gjatë vitit të tij si kryeministër, që është i lidhur kryekëput me njërin prej dy vëllezërve.
“Blerim dhe Shkëlqim Devolli janë pasuruar shpejt, përtej imagjinatës së tyre, dhe përtej njohurive tona. Për pak vite këta u bënë pronarë të kompanive më të fuqishme në vend, ndër to fabrikës së sfungjerit ‘Comodita’. Çudisë ‘Devolli’ nuk i mungon shpjegimi por hetimi”, thoshte Albin Kurti në foltore të Kuvendit.
Duke e sharë Devollin dhe pasanikët e tjerë, si deputet, Kurti u bë kryeministër. E me t’u bërë kryeministër, vetëm gjatë vitit të parë të Qeverisë Kurti, Devolli shënoi rritjen më të madhe të eksportit ndonjëherë.
Gazeta Nacionale mëson se në vitin 2020 kompania ‘Comodita’, pronë e Shkëlqim e Devollit, kishte eksportuar mallra prej vetëm 28 milionë eurove.
Ndërsa në vitin që Kurti erdhi në pushtet, kompania e Shkëlqim Devollit eksportoi 144 milionë euro, prej tyre shumica dyshekë, por edhe grurë e kafe, 116 milionë euro më shumë se vitin e kaluar, pa Kurtin në pushtet. Sigurisht që kjo rritje nuk ka asnjë lidhje me qeverinë, por me gjetjen e tregjeve të reja nga kjo kompani, posaçërisht tregun amerikan, e posaçërisht me rritjen e çmimeve të prodhimeve kineze, si pasojë e transportit të shtrenjtë. Në një fabrikë në Gjakovë kjo kompani i ka punësuar mijëra vetë. Ka mundësi që kur qeveria flet për rritje të punësimit, po i numëron edhe punëtorët e Comoditës.
E nëse e heqim shifrën e Devollit prej 144 milionë eurove dhe trendin vjetor që sillet rreth 90 milionë euro në vit, Kosova është pikërisht aty ku ka qenë vitin e kaluar, me rreth 475 milionë euro eksport.
Sipas Agjencisë së Statistikave, Kosova më 2019 eksportoi mallra në vlerë prej 383 milionë eurove, e në vitin 2020, që ishte viti më i keq për ekonominë, sepse kishte shpërthyer pandemia, Kosova eksportoi mallra në vlerë prej 474 milionë eurosh.
Ndërsa gjatë vitit 2021 – nga të dhënat e dërguara prej Doganës së Kosovës dhe Ministrisë së Financave – Kosova pati rritje të eksportit ku shifrat shkuan deri në 568 milionë euro [pa Devollin], duke krijuar trend që shënon rritje prej 90 milionë eurove çdo vit.
“Rritja ekonomike” – Të cilën Qeveria Kurti e përmend orë e çast, në fakt është rritje ekonomike e Devollit.
Të vetmen rritje që qytetari mesatar në Kosovë mund ta ndjejë gjatë një viti të qeverisjes Kurti, është ajo e çmimeve, ku sot një litër vaj fluturoi në 3 euro.
A po kthen Kurti borxh?
Kurti përveç që s’po e heton Devollin siç kërkonte dikur si deputet, sot si kryeministër po e përdor politikisht suksesin dhe rritjen e kësaj kompanie.
Kryeministri sa ishte në opozitë kishte zhvilluar fushatë të ashpër kundër Devollit. Fushatë e cila më vonë e shpërbleu me postin e kryeministrit.
Fakti se Kurti e kishte sulmuar Devollin, e kishte hidhëruar shumë ish-deputetin e VV-së, Florin Krasniqi, i cili pati sqaruar në T7, momentin kur Kurti i ka marr 20 mijë euro nga Devolli.
“Kur ka dalë me folë kundër Devollit, unë jam hidhëruar tepër shumë. Ai [Kurti] ka ardhur më 2011 në restorant temin, ku jemi ulë me Devollin sepse Albini më ka thirrë në telefon ku ka thënë ‘A po i thirrë Devollët me na ndihmu?’. Blerimi tha ‘Sa?’, përgjigja e Kurtit ishte ’20 mijë’. Devollët kanë pranuar. Nuk kanë kaluar një orë, financieri i tyre na i ka pru 10 mijë euro kesh, e më pas kanë ardhur edhe tjerat”, ishte shprehur Krasniqi më 2019.
Pikërisht në atë kohë, Kurti gjatë fushatës elektorale pati premtuar fushatë kundër Devollit.
Gjatë një tubimi në Pejë, Kurti kishte thënë se “Me qeverinë e Vetëvendosjes nuk do të ketë më tajkunë apo oligarkë, Kelmendë e as Devollë, që i detyron njerëzit...”.
Kjo ndodhi gjatë fushatës së zgjedhjeve të para kur Kurti doli i pari. Kryeministër u bë por s’i zgjati.
Rënien e tij e vlerësoi si të domosdoshme për ngritjen e nevojshme. E pasi u ngrit me 50% të votave, i bëri një vit me duar të zgjidhura, me fuqi ekzekutive të plotë, i vetëm në qeverisje, të hyrat e Devollit janë më të larta se kurrë./Nacionale