Shtatë nga 21 prej të akuzuarve për dallavere me Subvencione e kanë pranuar fajësinë dhe janë kthyer në dëshmitarë bashkëpunues të Prokurorisë Speciale të Kosovës. Për këtë çështje, të martën është mbajtur një seancë dëgjimore ku janë prezantuar dënimet që pritet të jepen ndaj këtyre personave. Gazeta Nacionale sjell detaje nga aktakuza e plotësuar dhe veprat penale që kanë kryer personat që tash janë bërë pishman, dhe pritet të rrëfejnë për gjithë strukturën e korrupsionit me subvencione.
Flamur Zeqiri, Bekim Shala, Kastriot Berisha, Dukagjin Mavraj, Habibe Dauti, Alban Bushati e Daut Kabashi. Të gjithë persona të akuzuar fillimisht nga Prokuroria Speciale për dallavere me subvencione, janë kthyer në dëshmitarë bashkëpunues të Prokurorisë, dhe kanë pranuar fajësinë. Një seancë dëgjimore është mbajtur një ditë më parë në Gjykatën Themelore të Prishtinës. Kjo në procedurën e ndarë për këta persona, për dallim nga 14 të tjerët që pritet të ballafaqohen me akuzat për keqpërdorime e korrupsion. Gjykata e ka aprovuar marrëveshjen për pranim fajësie.
Për këtë çështje më 4 prill prokurori i rastit, Rafet Halimi e ka dorëzuar sërish në gjykatë aktakuzën e plotësuar. Në seancën e djeshme, prokurori ka prezantuar kërkesën e tij për kohëzgjatjen e dënimeve për 7 personat që e kanë pranuar fajësinë dhe janë kthyer në dëshmitarë bashkëpunues. Gazeta Nacionale ka siguruar procesin e seancës dëgjimore e aktakuzën e plotësuar dhe sjell detaje.
Habibe Dauti – ka qenë zyrtare për pagesa në Agjencinë për Zhvillimin e Bujqësisë. Ajo akuzohej për keqpërdorim të detyrës zyrtare. Prokuroria ka kërkuar dënim prej një viti me burgim efektiv, si dhe ndalesë të ushtrimit të funksioneve publike prej një deri në dy vjet.
Flamur Zeqiri, Bekim Shala dhe Kastriot Berisha – akuzoheshin për veprën penale mashtrim me subvencione. Prokurori ka kërkuar dënim prej 1 vit, deri në 1 vit e dy muaj burgim për secilin prej tyre, përfshirë kohën e kaluar në paraburgim. Bekim Shala përveç marrëveshjes për pranim fajësie, ka kthyer mbi 33 mijë euro për kompensim të dëmit.
Dukagjin Mavraj – akuzohej për mashtrim me subvencione. Prokurori ka kërkuar dënim nga katër deri në gjashtë muaj burgim, pasi që i njëjti paratë nuk i ka pranuar për vete dhe ka qenë bashkëpunues.
Alban Bushati – akuzohej për marrje ryshfeti dhe falsifikim të dokumenteve. Prokurori ka kërkuar që për të dyja veprat penale, Bushati të dënohet me dënim unik nga 2 vjet deri në 2 vjet e gjashtë muaj burgim, dhe 500 euro gjobë.
Daut Kabashi – akuzohej për dhënie ryshfeti. Prokurori Halimi ka kërkuar që Daut Kabashi të dënohet me burgim deri në gjashtë muaj, dhe 500 euro gjobë.
Marrëveshjen për pranim fajësie dhe dënimet e tilla i kanë pranuar vetë të akuzuarit dhe mbrojtësit e tyre, dhe kanë thënë se kjo është bërë vullnetarisht. Gjyqtari i këtij rasti, Kujtim Krasniqi, tash ka në dorë vendimin për këta shtatë persona, aktgjykimi për të cilët do të shpallet më 19 prill. Vlen të theksohet se dënimi i gjyqtarit në këtë rast, nuk tejkalon kërkesën që e ka bërë prokurori, pra vendoset në afatet për dënimet e propozuara nga prokurori i rastit.
Prokuroria kishte paralajmëruar se do të arrinte marrëveshje të ngjashme edhe me disa të akuzuar të tjerë. Kjo vërtetohet nga drafti i parë i aktakuzës të cilën e kishte raportuar gazeta Nacionale ditë më parë. Në mesin e dëshmitarëve bashkëpunues, synoheshin të ftohen edhe Fuat Morina dhe Agron Krasniqi. Por, sipas të gjitha gjasave, Prokuroria nuk ka arritur marrëveshje rreth kushteve me të akuzuarit.
Çfarë veprime kryen ata që u penduan?
Marrëveshjen për pranim të fajit e bënë. Edhe dëshmitarë bashkëpunues të prokurorisë po. Por, në aktakuzën e Prokurorisë Speciale përshkruhen veprimet e këtyre shtatë personave, në rastin e dallavereve me subvencione. Gazeta Nacionale sjell detaje.
Habibe Dauti si zyrtare për pagesa në Agjencinë për Zhvillimin e Bujqësisë ishte bërë pjesë e kësaj strukture për manipulimet me Subvencionet. Detajet zbardhen në aktakuzën e Prokurorisë. “Flamur Zeqiri në cilësi të fermerit aplikon për përfitimin e subvencioneve, kinse ka të mbjellë 55.5 hektarë me bimë mjekësore aromatike në Viti. E pandehura kryen kontrollin administrativ të lëndës dhe e dërgon në Drejtorinë e Kontrollit. E pandehura edhe përkundër raporitet të komisionit se fermeri nuk ka të mbjellë këtë sipërfaqe me këtë bimë, e aprovon për pagesë këtë lëndë në mënyrë të kundërligjshme, duke i shkaktuar dëm buxhetit të Kosovës në shumën 54 mijë e 750 euro”, thuhej në aktakuzën e Prokurorisë.
Në dëshminë e saj në Prokurori, aprovimin e pagesës për fermerin në fjalë e kishte bërë pas presionit nga Luan Statovci, drejtor për pagesa në Agjencinë për Zhvillimin e Bujqësisë. “Habibja ka treguar se kishte pranuar një email të drejtorit Statovci, Luani pastaj kishte shkuar në zyre dhe e kishte informuar që bujqësia organike nuk duhet të ketë kontroll në terren, dhe për Flamur Zeqirin duhet të aporvohet pagesa në mënyrë që të mos dëmtohej e pandehura, dhe pagesën e ka aprovuar pas emailit nga drejtori Luan Statovci.”
Flamur Zeqiri në cilësinë e fermerit kishte ofruar të dhëna të pasakta për të përfituar subvencione nga shteti. “Flamur Zeqiri aplikon për subvencione kinse ka të mbjellë kulturën e bimëve aromatike. Komisioni konstaton se gjatë punës në terren nuk ka asgjë të mbjellë, por me datë 05.10.2020 i pandehuri takohet me Salih Statovcin dhe ky prezantohet si zyrtar i kompanisë Bio-Q-Check dhe ia siguron certifikatën për bimë aromatike. Pas kësaj, Luan Statovci në zyrën e tij e udhëzon për të bërë ankesë dhe ta dorëzojë certifikatën. Pasi që ekzekutohet pagesa, i pandehuri përfiton shumën në vlerë 54 mijë e 75 euro”, thuhet në aktakuzë.
Zeqiri si dëshmitar bashkëpunues për Prokurorinë, e kishte konfirmuar se drejtorit për pagesa në AZHB, Luan Statovcit ia kishte dorëzuar 12 mijë e 750 euro pasi ishte ekzekutuar pagesa. “Lënda e Flamurit ka qenë shumë e ndërlikuar dhe ka shpenzuar shumë mund e energji për këtë lëndë, dhe Statovci i kishte shkruar t’i biem shkurt se mundet me të dalë problem i madh, dhe ia ka kërkuar 12 mijë e 750 euro”, bëhet e ditur më tutje.
Bekim Shala, ngjashëm si Flamur Zeqiri, kishte dhënë para që të përfitonte subvencione, në emër të kulturave që nuk i kishte mbjellë kurrë. “Bekim Shala aplikon ne emër të vetin për kulturën e grurit, mirëpo pas një kohe në marrëveshje ndryshon aplikimin nga kultura grurë e misër në bimë aromatike dhe pajisjet me certifikatë nga Bio-Q-Check në mënyrë të kundërligjshme dhe dokumente të falsifikuara. Bekim Shala i tërheq paratë nga banka në dy këste në emër të tij dhe të bashkëshortes, duke i shkaktuar dëm buxhetit të Kosovës në vlerë 180 mijë euro.”
Pas pranimit të fajësisë dhe kthimit në dëshmitarë bashkëpunues, Shala kishte treguar detaje të reja në Prokurori. “Alban Bushati dhe Salih Kelmendi i kishin thënë se Bekimi nëse dëshiron ta përfitojë granitin duhet t’ua japë 15% të vlerës së granitit, por më vonë kishin ndryshuar rrethanat kur ishte takuar me Berat Nikën dhe Sadat Shkodrën të cilët i kishin bërë një ofertë Bekimit ku i kishin thënë se nëse dëshironte të fitonte shtallën e viçave si grand duhej ta ndryshonte kulturën bujqësore nga misri dhe gruri e që i kishte realisht të mbjella në bimë mjekësore – aromatike ku fillimisht u ka thënë nuk dëshiron të ketë problem me shtet mirëpo Berati dhe Sadati i kanë premtuar se ata do ta kryejnë atë punë duke i thënë ‘ne jemi shteti dhe ne vendosim për të gjitha dhe ti nuk ke nevojë për tjetër gjë” dhe premtimi ishte se nuk kisha nevoje që të jap ryshfet 15% e vlerës së grandit”, theksohet në aktakuzë.
Kastriot Berisha metodën e njëjtë të përfitimit të subvencioneve e përdori edhe Kastriot Berisha. “Kastriot Berisha aplikon në komunën e Pejës për përfitimin e subvencioneve. Dhe pastaj paraqet kërkesën për ndërrimin e kulturës kinse ka të mbjellë bimë aromatike. Agjencia ekzekuton pagesat dhe Kastriot Berisha pranon para në dy këste, duke e dëmtuar buxhetin e Kosovës në vlerë 245 mijë e 500 euro.”
Pasi u bë dëshmitar bashkëpunues, Berisha kishte treguar në detaje se e gjithë struktura ishte në krye me Luan e Salih Statovcin. “Dikund në muajin nëntor 2020 ka deklaruar se i kishin dalë paratë e subvencioneve në vlerë rreth 105,000,00 Euro dhe ka thënë se e ka njoftuar Salihin dhe e kishin lënë të takoheshin te autostrada në HIB në Fushë Kosovë, ku kishin pirë kafe pastaj kur kanë dalë kanë shkuar në një veturë Xhip dhe ia ka dorëzuar paratë në vlerë rreth 26,000,00 Euro në veturë. Njëjtë kanë vepruar edhe kur është bëre dyfishimi i subvencioneve me vendim të Qeverisë dhe prapë kanë arritur marrëveshje Kastrioti dhe Salihi që të veprojnë njëjtë sikur herën e parë dhe në fillim të vitit 2021 i ka dalë në llogarinë time bankare vlera rreth 140,000.00 Euro”, thuhet në aktakuzën që e ka siguruar Nacionalja.
Dukagjin Mavraj ishte i përfshirë në këtë aferë pak më ndryshe. Ai kishte aplikuar në emrin e një miku të tij, dhe vetë kishte zbardhur detaje.
“Dukagjin Mavraj ka dëshmuar se është e vërtetë se në vitin 2019 ka aplikuar dhe përfituar subvencione, mirëpo kjo ka qene me kërkesë te Kushtrim Zogaj të cilin e ka shok nga fëmijëria. I njëjti i ka thënë që të aplikojnë së bashku por në emrin e Dukagjinit sepse sipas Kushtrimit ai është person zyrtar dhe nuk ka dëshiruar që subvencionet të dalin në emrin e tij, prandaj Dukagjini ka aplikuar në emrin e tij personal mirëpo me te gjitha procedurat e aplikimit është marrë Kushtrim Zogaj, të gjitha dokumentet i ka përpiluar dhe nënshkruar Kushtrim Zogaj duke përfshirë aplikacionet për subvencione, kontratat për marrjen e tokave me qira e të tjera. Në vitin 2019 pasi që i kanë dalë mjetet e subvencioneve në llogari të Dukagjinit, i njëjti i ka tërheqë ato dhe të gjitha ia ka dhënë Kushtrim Zogajt i cili i ka investuar në barnatoren bujqësore, konkretisht në farë për grurë dhe produkte tjera bujqësore dhe pasi i ka shitë farën e grurit e produktet e tjera, ia ka dhënë Dukagjinit shumën e parave në vlerë prej rreth 2000 Euro”, thuhet në aktakuzë.
Alban Bushati akuzohet për marrje ryshfeti e falsifikim të dokumenteve. Në cilësinë e zyrtarit administrativ në drejtorinë e Bujqësisë në Pejë, në bashkëkryerje kishin ndikuar që fermerëve t’u jepen certifikatat e falsifikuara kinse kanë të mbjella bimë aromatike. Vetëm në një rast, buxheti i Kosovës u dëmtua mbi 180 mijë euro nga veprimet e Bushatit. Megjithatë, ai e pranoi fajin më pas dhe tregoi në detaje si kryheshin këto veprime.
“Alban Bushati gjatë intervisitimit ka deklaruar se bashkë me Salih Kelmendin kishin pranuar ryshfet nga Bekim Shala në shumë të përgjithshme prej 92,491.00 euro në disa rata nga e cila shumë Alban ka deklaruar se Sadat Shkodrës ia ka dorëzuar shumën prej 55,426.00 euro, ku i pranishëm ka qenë Berat Nika, ndërsa pjesën e mbetur e kishin ndal për vete dhe e kishin ndare proporcionalisht me Salih Kelmendin secili nga 18,532.00 euro, po ashtu Alban Bushati e ka pranuar se vet i kishte plotësuar draft-kontratat që kanë qenë të gatshme, konkretisht kontratën në mes të Bekim Shales dhe Arlinda Seferit të datës 05.10.2019 dhe 02.08.2020 dhe kontratën e lidhur mes Milazim Shala dhe Arlinda Seferi e datës 01.09.2019, pasi që ketë gjë ia kishte kërkuar Sadat Shkodra me qëllim të kompletimit të dokumentacionit, nder tjera Albani e ka pranuar se ai ia kishte plotësuar kërkesën për ndryshimin e kulturës nga kultura grurë dhe misër në kulturën bimë organike-mjekësore dhe aromatike”,theksohet në aktakuzën e Prokurorisë Speciale.
Daut Kabashi ishte si udhëheqës i sektorit të pylltarisë në komunën e Istogut.
“Lidhur me pagesat për subvencione në AZHB i pandehuri ka deklaruar se nuk i kujtohet muaji por në vitin 2020 e ka kontaktuar në telefon zyrtari i pagesave Sadat Shkodra, pas telefonatës ka shkuar në zyrën e tij dhe kanë biseduar për aplikimin për sipërfaqe të mbjella. Pas kontrollimit të dokumentacioni kanë ardhur në përfundim se ka qenë gjithçka në rregull, mirëpo Sadati e ka udhëzuar që të shkoj edhe te drejtori Luan Statovci. Së bashku kanë shkuar në zyrën e Luanit, Sadati i ka treguar se me sipërfaqe është mirë, tutje Sadati ka dale dhe Luani i ka thënë të pandehurit se për 4 muaj nuk i ke të shkruara vlerat – analizat për cilësinë e qumështi, dhe për këtë punë duhesh me na dhënë 2,000.00 euro, në mënyrë që për këta 4 muajsh t’i plotësojmë të dhënat dhe ta rregullojmë cilësinë e qumështit edhe pse nuk i ke. I pandehuri i ka thënë se nuk i ka paratë dhe janë marrë vesh që kur të dalin parat e subvencioneve i pandehuri të ua jap 2,000.00 euro”, pretendon Prokuroria.
Gati 650 mijë euro subvencione u dhanë me dallavere. Më shumë se 300 mijë prej tyre, i përfituan zyrtarët publikë në kuadër të Agjencisë për Zhvillimin e Bujqësisë. Për këtë ndiqej një metodë e sofistikuar. Zinxhiri i personave të përfshirë ishte i gjatë. Nga gruri, personave që aplikonin kultura e mbjellë u ndryshonte në bimë aromatike, në mënyrë që përfitimi të jetë më i madh.
Aktakuza në rastin e njohur si “Subvencionet I” është ngritur kundër 11 të pandehurve si persona zyrtarë dhe dhjetë të tjerë si përfitues të subvencioneve. Të gjithë dyshohen për: keqpërdorim të detyrës zyrtare, marrje ryshfeti, mashtrim në detyrë, dhënie ryshfeti, mashtrim me subvencione dhe falsifikim të dokumentacioneve./Nacionale