Ish komandanti i Ushtrisë Çlirimtare të Kosovës, Salh Mustafa i njohur si Cali, është shpallur fajtor dhe është dënuar me 26 vjet burgim për krime lufte nga Gjykata Speciale, raporton Gazeta Sinjali.
Në seancën përfundimtare në rastin e Calit, trupi gjykues ka përcaktuar dënim me 10 vjet burgim për pikën 1 të akuzës, ndalim arbitrar, dënim me 22 vjet për pikën 3, torturë dhe me 25 vjet burgim për vrasje të paligjshme.
Specialja ka vendosur që dënimi unik për Mustafën të jetë 26 vjet burgim, në të cilin llogaritet koha e kaluar në paraburgim.
“Në emër të popullit të Kosovës, për arsyet e shtjelluara në aktgjykim dhe të përmbledhura më lartë, dhe duke marr parasysh të gjitha provat dhe argumentet e palëve mbrojtëse të viktimave, Trupi Gjykues, në bazë të neneve 43 dhe 44 të Ligjit dhe rregullave 158 dhe 159, 163 dhe 165 të Rregullores, ju shpall juve z. Mustafa, fajtor për:
Pikën 3: torturë si krim lufte, sipas neve 14 paragrafi 1, pika c dhe i dhe neneve 16 1a të Ligjit”. – thuhet në aktgjykimin e lexuar nga gjyqtarja.
Kujtojmë që ky është aktgjykimi i parë dënues për krime lufte nga Gjykata Speciale.
Më 24 shtator 2020, Salih Mustafa u arrestua dhe u transferua në objektin e paraburgimit të DHSK-së. Më 28 shtator 2020, bëri paraqitjen e parë para Gjykatësit të Procedurës Paraprake, Nikola Giju. Në paraqitjen e mëtejshme më 28 tetor 2020, z. Mustafa u vetëdeklarua i pafajshëm në lidhje me të gjitha akuzat e paraqitura në aktakuzë.
Palët, Zyra e Prokurorit të Specializuar (ZPS) dhe Mbrojtja dorëzuan (në mënyrë konfidenciale) versionet më të fundit të dosjeve paraprake, përkatësisht më 22 shkurt dhe 6 maj 2021. Më 7 maj 2021, Gjykatësi i Procedurës Paraprake ia kaloi dosjen e çështjes Trupit Gjykues I.
Tetë viktima morën pjesë në procesin gjyqësor si një grup i vetëm dhe u përfaqësuan në sallën e gjyqit nga mbrojtësja e viktimave.