Raporti për Kosovën pritet të miratohet sot nga Parlamenti Evropian, pasi një gjë të tillë e kishte bërë më herët Komisioni i Parlamentit Evropian për Punë të Jashtme.
Kështu ka bërë të ditur raportuesja për Kosovë, Viola von Cramon, duke thënë se debati mbi raportin e saj do të fillojë rreth orës 11:00.
Në një postim në Twitter Viola von Cramon ka treguar se në ora 17:00 bashkë me raportuesin e përhershëm për Serbinë, Vladimír Bilčík do të mbajnë një konferencë të përbashkët për shtyp.
Me 50 vota për, dhjetë kundër dhe nëntë abstenime, Komisioni për politikë të jashtme i PE-së ka miratuar në muajin shkurt raportin për Kosovën, në të cilin u bëhet thirrje edhe një herë pesë shteteve të BE-së, të cilat nuk e kanë njohur Kosovën, që ta bëjnë një gjë të tillë.
Spanja, Sllovakia, Rumania, Qiproja dhe Greqia janë pesë vende anëtare të Bashkimit Evropian që ende nuk e kanë njohur pavarësinë e Kosovës.
https://twitter.com/ViolavonCramon/status/1374771743177515009 /KP