Videoja e partisë në pushtet Vetëvendosjes që u publikua dje në të cilën pati akuza të rënda ndaj ish-udhëheqësve të PDK-së e liderëve te tjerë opozitarë ka nxitur reagime të ashpra. Ndër ta ka qenë edhe anëtari i PDK-së, Bujar Cakolli, i cili ka kërkuar nga partia e tij që t’i ndërpres koalicionet me Vetëvendosjen nëpër komuna, raporton Gazeta Sinjali.
Njëra ndër komunat ku LVV dhe PDK udhëheqin është Gjilani. Gazeta Sinjali ka kontaktuar me ushtruesin e detyrës së kryetarit të PDK-së atje, Riad Rashiti, i cili është drejtor i Financave në komunë, për ta pyetur se a do ta lëkund koalicionin publikimi i kësaj videoja nga ana e VV-së.
Rashiti e quajti veprim skandaloz publikimin e videos, duke shtuar se do t’i kontribuoj për keq koalicioneve mes dy partive në nivel lokal.
Ai madje tha se Vetëvendosjes i takon më së paku që ta largojë vëmendjen siç tha ai nga problemet që e kanë kapluar vendin.
“Publikimi i videos është një veprim skandal, që i dëmton edhe më shumë proceset që po kalon Kosova. E dëmton rrugën ku do të duhej të kishte unitet politik për të ecur përpara si shoqëri. Kosova është në një proces më të rëndin pasluftës dhe më së paku i takon VV-së me këso video ta largojë vëmendjen nga problemet që e kanë kaplu. Këto kontribuojnë për keq, jo për mirë, se cili do të jetë efekti i dëmeve nuk mund të them asgjë tani për tani”, tha Rashiti për Sinjalin.
Sa i përket prishjes së koalicionit, ai tha se vendimin e marrin strukturat e partisë, duke marrë për bazë publikimin e videos.
“Këto vendime i takojnë strukturave të PDK-së, lidershipit. Besojmë që ata e kanë parasysh këtë zhvillim të fundit, me atë video. Është kompetencë e tyre”, tha ai.
Ndryshe, kjo video ka nxitur shume reagime e akuza nga partitë opozitare./Sinjali