Policia e Trafikut shpeshherë përballet me qytetarë të cilët përveç që i shkelin rregullat e komunikacionit, edhe eskalojnë në përleshje e kërcënime. Një rast i tillë i kanosjes ka ndodhur mbrëmë në rrugën “Fehmi e Xhevë Llaadrovci’, në Skenderaj, raporton Gazeta Sinjali.
Burimet thonë se për këtë rast është vënë në dijeni edhe Prokuroria dhe ka nisur hetimet ndaj të dyshuarit Xh.,V, 30-vjeçar, i cili u kap me zyrtarët policorë të cilët ia tërhoqën vërejtjen se e ka parkuar automjetin e tij keq.
Kjo siç duket e mllefosi qytetarin, i cili po dyshohet se i ka kanosur seriozisht policët me fjalët “S’ju lo me hi në Skenderaj, s’guxoni me i bo foto veturës time”, të cilët i ka fyer dhe për një moment edhe është nisur në drejtim të tyre.
Si rezultat i kësaj, ai ka përfunduar në stacion policor ku është intervistuar nga hetuesit. Me urdhër të Prokurorit të Shtetit ndaj tij është iniciuar rasti “kanosje”.