Deputetja Duda Balje është përplasur me deputetin e VV-së, Armend Muja i cili ka kërkuar përjashtimin e saj nga Komisioni Hetimor Parlamentar, për shkak të papajtueshmërive në çështjen e hetimit të sektorit të energjisë për periudhën 2006-2022. Ajo ka thënë se këtë çështje do ta sqarojë me kryeministrin Albin Kurti, posa të kthehet nga SHBA-ja.
Balje u shpreh se nuk është punëtore e VV-së, por sipas saj, kjo përplasje nuk do të ndikojë që të prishet koalicioni mes partisë së saj dhe VV-së.
“Unë nuk jam punëtore e VV-së, jam deputete dhe kam mendimin tim personal. E respektoj partnerin e koalicionit, ka disa momente, p.sh kodi civil, trusti, tash në komision hetimor për mua nuk është e logjikshme…. kam mendimin personal. Ata po duan me më zëvendësu mua me dikë tjetër nga grupi parlamentar multietnik. Taman puna me prishë koalicionin për shkak të mendimit të Armend Mujës. Kurrë, ai është mendim i tij personal. Gjithqysh do ta takoj kryeministrin, do ta shfrytëzoj rastin kur të vijë, tash është jashtë shtetit, që të bisedoj me të”, tha Balje në ATV.
“Këtu është arsyeja e vetme, e vetme, edhe unë në takimin e fundit të komisionit kam votuar kundër një propozimi të VV-së dhe e kam arsyetuar pse jam kundër. Mendimi im ka qenë kundër mendimit të VV-së dhe ata kanë vlerësuar që nuk jam disiplinuar. Edhe Arbër Rexhaj e kanë pranu që ata kanë vota”, ka thënë Balje./Sinjali