Nëse pesë anëtarë të një familje do ushqeshin vetëm me nga dy burekë (një euro njëri) në ditë atyre do ju nevojiteshin 300 euro në muaj. Nëse e gjithë familja për veshmbathje, për energji e obligime komunale, e për udhëtim do shpenzonte 160 euro tjera, atëherë mjetet financiare minimale të nevojshme për atë familje do të ishin 460 euro në muaj.
Në bazë të këtyre llogaritjeve minimale, Sindikata e Pavarur e Sektorit Privat të Kosovës (SPKS) ka ardhur në përfundimin se sa duhet të caktohet paga minimale nga Qeveria e Kosovës. Por nga sot ata janë të zhgënyer me qeverinë pasi kjo e fundit në mbledhjen e saj të sotme vendosi për të caktuar pagën minimale në Kosovës në shumën minimale prej 264 euro në muaj bruto ose 250 neto.
“Është pa se qeveria s’do merr parasysh sugjerimet tona. Qeveria sot ka bërë shkelje ligjore, pasi që këshilli ekonomiko-social që është dashur të bëjë propozimin e s’e ka bërë një hap të tillë. Prandaj në mënyrë joligjore është marrë vendimi i sotëm,” – thotë për Nacionalen kryetari i SPKS-së, Jusuf Azemi, i cili po ashtu insiston se kjo pagë është e pamjaftueshme aq sa është e pakuptimtë me zhvillimet e rrethanat e tanishme.
Dikur me pretendimet e sindikatës së sektorit privat pak a shumë pajtohej edhe kryeministri i tanishëm Albin Kurti, dhe këtë qëndrim e kishte jo më larg se para dy viteve.
“Është absurde që paga mesatare në sektorin publik të jetë mbi 500 euro, më një rritje prej mbi 100 euro në 5 vitet e fundit, ndërkohë që kjo rritje nuk është as 15 euro në sektorin privat ku e dini që pagat mesatare ngelen diku rreth 350 euro,” –thoshte Kurti. Kryeministri i tanishëm shtonte se “nuk mund të ketë pagë minimale më pak se 350 euro” në sektorin privat.
Qeveria e Kosovës sot, 13 prill, ka miratuar Projektligjin për pagën minimale, dhe ku sipas kryeministrit Kurti ajo do jetë 250 euro neto dhe 264 euro bruto. Miratimi i këtij projektligji i hap rrugë sjelljes në qeveri të vendimit për rritje të pagës minimale.
Sindikalisti Azemi pos që konteston hapat ligjorë të qeverisë thotë se vendimi i sotëm i qeverisë kallëzon se qeveria është shkëputur nga realiteti, pasi sot paga minimale në vend nuk është kaq e ulët.
“Prej shtatorit jemi në teren dhe kemi parë dhe në biseda me punëtorë e punëdhënës kemi parë që paga minimale është shumë më e lartë se kaq” – thotë kryesindikalisti, i cili vazhdon të insistojë se me vendimin e qeverisë mund të dëmtojë punëtorë të caktuar nëse paga e caktuar është kaq e vogël.
“Bizneset janë tu u përballë me mungesë të punëtorëve, prandaj më nuk vlen paga minimale 250 euro dhe kjo duhet të shfrytëzohet, pasi edhe bizneset e kanë të qartë se me paga të ulta s’do mund të kenë punëtorë, ata se kanë problem më të paguajnë 400 euro pagë” – vazhdon kryesindikalisti Azemi dhe që insiston se këto llafe i ka dëgjuar vazhdimisht nga pronarët e bizneseve.
Duke u përballë me kriza të vazhdueshme, kohëve të fundit kemi ngritje të hatashme të çmimeve të produkteve bazë, pastaj naftës dhe energjisë elektrike çka ka bërë që të rritet dukshëm kostoja e jetës në vend.
Pos rritjes së pagës minimale, kërkesë e vazhdueshme ndaj qeverisë Kurti ka qenë edhe largimi i TVSh-së dhe akcizës për produktet bazë dhe çka potencialisht do ulte koston e së paku shportës ushqimore.
Kurti në të kaluarën kishte premtuar se do ta bënte edhe një gjë të tillë./Nacionale