Shefi i EULEX-it, Lars-Gunnar Wigemark, ka njoftuar se ky mision u ka dorëzuar furnizime esenciale oficerëve të Policisë së Kosovës në Rudnicë dhe Jarinje.
Ai tha se kjo u realizua pas kërkesës së Policisë së Kosovës. Sipas tij, dorëzimi i këtyre furnizimeve ndodhi më 17 dhjetor.
“Me kënaqësi ju njoftoj se pas kërkesës së Policisë së Kosovës, EULEX-i më 17 dhjetor, oficerëve të Policisë së Kosovës në pikën e përbashkët të kalimit në Rudnicë/Jarinjë u ka dorëzuar furnizime esenciale, duke përfshirë furnizime ushqimore, veshmbathje si dhe mjete higjienike”, shkroi ai në llogarinë e tij në Twitter.
Ndryshe, nëntë policë, të cilët tash e 11 ditë po patrullonin në dy pika kufitare janë sëmurë, për transportimin e tyre është kujdesur njësiti i misionit paqëruajtës, KFOR.
Nëntë pjesëtarë të Policisë së Kosovës janë tërhequr nga Jarinja për shkak të problemeve shëndetësore që kanë.
Baki Kelani, zëdhënës i Policisë së Kosovës, ka konfirmuar se transportin e policëve e ka kryer KFOR-i.
“Bashkëpunim dhe kontakte të vazhdueshme PK-ja mban edhe me KFOR-in, i cili sot për shkaqe shëndetësore ka përkrahur transportimin e 9 zyrtarëve policorë nga veriu në jug”- ka thënë Kelani.
Javën e shkuar, Gazeta Sinjali raportoi se zyrtarët policorë ishin bllokuar dhe kishin mungesë të ushqimit dhe madje iu ishte pamundësuar edhe mbajtja e higjienës personale./Sinjali