Një incident ka ndodhur mëngjesin e djeshëm në hyrje të Qendrës Klinike Universitare të Kosovës në Prishtinë, pasi një person dyshohet se ka kërcënuar rojën, raporton Gazeta Sinjali.
Sinjali mëson se 26-vjeçari dyshohet se për shkak të mosfunksionimit të laurës në hyrjen kryesore, ka kanosur me thikë në dorë 45-vjeçarin.
Përballë kësaj situate, viktima është detyruar që rastin ta denoncojë në Policinë e Kosovës, të cilët kanë dalë në vendin e ngjarjes për të kryer ekzaminimet e nevojshme.
Njësitë policore kanë arritur që të arrestojnë të riun i cili u shoqërua në stacion policor për intervistim dhe po ashtu kanë konfiskuar thikën të cilën e posedonte ai.
Gjatë intervistimit i dyshuari ka pranuar të ketë kryer veprën për të cilën dyshohet dhe me urdhër të prokurorit ndaj tij kanë nisur hetimet nën dyshimet për kryerjen e dy veprave penale ‘Kanosje’ dhe ‘Mbajtje në pronësi, kontroll ose posedim të paautorizuar të armës’.