Serbët lokalë në pjesën veriore të Kosovës janë mbledhur sot në Rudarë për të protestuar kundër deklaratave të kryeministrit të vendit, Albin Kurti, lidhur me barrikadat e vendosura në disa zona atje. Përfaqësues të të ashtuquajturit ‘shtabi i krizës së popullit serb nga veriu i Kosovës’, kanë bërë me dije se deklaratat e Kurtit i konsiderojnë si kërcënim. Ata po ashtu janë kapur edhe me ambasadorin e Gjermanisë në Kosovë, Joern Rohde, për të cilin po thonë se me deklaratat e tij po mbështet hapur kryeministrin Kurti, raporton Gazeta Sinjali.
Qytetarët serbë tashmë kanë nisur të tubohen në protestën e cila u tha se do fillonte në orën 12:00. Në këtë protestë pjesëmarrjen e kanë të detyrueshme të gjithë të punësuarit në institucionet të cilat funksionojnë sipas sistemit të Serbisë, nga mbarë Kosova, ndërsa janë ftuar edhe qytetarë nga qytetet e afërta të Serbisë, siç janë Rashka, Novi Pazari etj.
Sinjalizues të Gazetës Sinjali kanë dërguar pamje nga vendi i ngjarjes, ku shihen serbët të cilët mbajnë në duar pankarta me mbishkrime të ndryshme në gjuhën serbe. Ata kanë shpalosur një pankartë të madhe, ku shkruhet: “Kurti, Kosova nuk është territori juaj, kjo është toka jonë stërgjyshore”.
Raportohet se të pranishëm janë edhe përfaqësues të Listës Serbe.
Lidhur me protestën janë deklaruar edhe nga Policia e Kosovës, të cilët përmes një komunikate për media, kanë bërë thirrje që protesta të jetë e qetë, duke bërë me dije se sipas detyrës zyrtare do të kujdeset për ruajtjen e rendit dhe qetësisë publike si dhe detyrave të përcaktuar sipas Kushtetutës së Republikës së Kosovës.
Tutje ata apelojnë qytetarët që të ruajnë qetësinë dhe të mos bien pre e provokimeve të mundshme.
Kujtojmë se presidenti serb, Aleksandar Vuçiq dje tha se barrikadat në veri do të hiqen “kur Prishtina të formojë Asociacionin e Komunave Serbe.
Ndryshe, kryeministri i Kosovës Albin Kurti, gjatë një interviste për mediat ndërkombëtare ditë më parë, pati thënë se largimi i barrikadave në veri nuk mund të përjashtojë viktimat.
Edhe ambasadori gjerman në Prishtinë, Joern Rohde, duke folur rreth situatës më të re të krijuar në veri të Kosovës, tha se barrikadat duhet të hiqen deri për Krishtlindje, si dhe kërkesa e Beogradit për kthimin e forcave serbe në Kosovë është absurde dhe e papranueshme.
Situatën e tensionuar në javët e fundit në veri, po e monitoron nga afër edhe Misioni Evropian për Sundim të Ligjit, EULEX.
EULEX-i në njoftimin e fundit lidhur me situatën e sigurisë në veri, ka bërë me dije se njësitet e specializuara të këtij misioni janë duke kryer patrullime vëzhguese, përfshirë patrullimet në këmbë në Mitrovicën Veriore dhe Zveçan.
Nga 10 dhjetori, grupe të serbëve në veri të Kosovës kanë ngritur barrikada në rrugët që çojnë drejt vendkalimeve kufitare me Serbinë, Jarinjë dhe Bërnjak.
Me këtë veprim, ata i janë përgjigjur arrestimit të ish-policit serb, Dejan Pantiq, i dyshuar për një sulm kundër zyrtarëve të Komisionit Qendror të Zgjedhjeve në veri. Kusht për heqjen e barrikadave ata kanë lirimin e Pantiq.