Një lokal në Lagjen Pejton në Prishtinë, që është shumë i frekuentuar, duket se ka nevojë për një punëtor të ri. Deri këtu, gjithçka është në rregull.
Por, mënyra se si e ka shprehur këtë, është problematike.
Në njoftimin e shtypur në derën e lokalit shkruhet se ky biznes “kërkon enëlarëse” vetëm të gjinisë femërore.
“KËRKOJMË ENËLARSE FEMËN” – ishte njoftimi me shumë gabime drejtshkrimore, i vendosur në hyrje të lokalit.
Sidoqoftë, përtej gabimeve drejtshkrimore, ajo që bie në sy është kërkesa që vetëm gratë të punësohen për këtë pozitë. Një gjë e tillë lë të nënkuptohet se pastrimi i enëve është punë të cilën duhet ta bëjnë vetëm gratë.
Gazeta Nacionale ka kontaktuar aktivisten për të drejtat e grave, Zana Avdiu, e cila nuk ka hezituar ta ndajë shqetësimin e saj lidhur me këtë. Qasjen e tillë, ajo e ka cilësuar si diskriminuese.
“Është diskriminim sepse hyn në kuadër të përcaktimit të roleve gjinore: çka përfshin pastërtia është punë e grave dhe vajzave. Nuk besoj që (lokali) ka dashur t’i favorizojë gratë për ta ulur papunësinë në mesin e tyre.”.
Tutje, Avdiu ka kontestuar edhe përdorimin e termit “femër” duke shpjeguar dallimin ndërmjet termit “femër” dhe “grua”.
Aktivistja ka sqaruar se këta dy terma dallojnë, sepse i pari flet për përkatësi biologjike, kurse i dyti për përkatësi shoqërore.
“Një femër nuk është grua gjithmonë, edhe nëse bëhet fjalë për njerëz”, tha Avdiu.
“Bëhet fjalë për dallimin mes seksit dhe gjinisë. Seksi është përcaktim biologjik, kurse gjinia tregon rolin shoqëror dhe kulturor. Feminizmi nuk mund të kuptohet pa e bërë këtë dallim, i cili është thelbësor dhe prandaj jam kundër termit “femër” si në rastin në fjalë.”, ka përfunduar aktivistja.
Diskriminimi mbi baza gjinore dhe vështirësitë në punësim mbeten dy nga sfidat më të rënda për gratë në Kosovë. /Nacionale