Liubov Raunchuk është njëra nga refugjatet e luftës së Ukrainës e cila ka ardhur në Kosovë.
Ajo ka vetëm pak ditë në kryeqytetin e Kosovës, teksa në emisionin “Imazhi i ditës” në RTK ka rrëfyer situatën në Ukrainë dhe për ditën kur iku nga vendlindja e saj për një jetë më të sigurt për shkak të agresionit rus atje.
“Për aq sa di agresioni rus po vazhdon ende. Situata është kryesisht nën kontroll nga ushtria jonë por Rusia po bëhet përditë e më agresive dhe gjithsesi që kanë vrarë edhe civilë. Diku rreth 40 fëmijë tashmë janë të vrarë. Shpresojmë që autoritet tona dhe presidenti Zelensky do të bëjnë më të mirën e tyre. Ndoshta për herë të parë po ndihemi kaq krenarë për qeverinë që e kemi zgjedhur”, ka theksuar Raunchuk.
Ajo ka treguar se në Ukrainë e ka lënë familjen dhe po mundohen që të mbajnë sa më shumë komunikim, derisa ka thënë se në Kosovë ndodhen së bashku me të dashurin e saj, pasi qysh më herët kishin planifikuar ta vizitonin Ballkanin por në një situatë krejt tjetër.
“Familja ime refuzoi të largohej nga Ukraina sepse ajo është shtëpia jonë, vendi ynë dhe jeta jonë”, ka shtuar ajo.
Ajo tutje ka sqaruar se ka arritur në Kosovë më 28 shkurt në ditën e katërt të agresionit rus, teksa ka hasur vështirësi për shkak të mungesës së dokumenteve dhe i është dashur të shkojë në Shkup për të marrë vizën.
Raunchuk ka thënë se të gjithë personat me të cilët është takuar dhe janë njoftuar se është nga Ukraina janë përpjekur që ta ndihmojnë dhe t’ia bëjnë jetën më të lehtë.