Pas zgjedhjes së presidentes, Vjosa Osmani, deputetja nga AAK-ja Albena Reshitaj e cila mori pjesë në seancën e jashtëzakonshme të Kuvendit, përkundër partisë së saj që ka kundërshtuar një veprim të tillë, theksoi se vendimi i saj ka qenë vendim i duhur, siç potencoi ajo për të ndërtuar institucionet e vendit pa ndikimin e Beogradit.
Deputetja Reshitaj tha se vazhdon të jetë pjesë e AAK-së, si nënkryetare e kësaj partie. Teksa iu përgjigj gazetarëve se nëse e përjashtojnë nga partia aktuale, ajo tha se do të qëndrojë si deputete e pavarur.
Reshitaj: Jam pjesë e AAK-së, jam nënkryetare e partisë
“Thjesht unë isha sot pjesë e kësaj seance, pjesë e opozitës, së bashku edhe përfaqësues të Lidhjes Demokratike të Kosovës, gjithashtu edhe një përfaqësuese të PDK-së dhe mund ta them me shumë bindje, për herë të parë në histori të vendit, kemi lënë jashtë ndikimin e Beogradit për ndërtimin e institucioneve të vendit. Unë jam pjesë e Aleancës për Ardhmërinë e Kosovës, jam nënkryetare partisë, ende nuk është mbledhur kryesia e partisë për të marrë ndonjë vendim. Të gjitha të tjerat janë vetëm spekulime. Unë do të qëndroj deputete e pavarur, por nuk e besoj që do të vije deri tek ajo (përjashtimi nga partia). Ka qenë një shembull i Kuvendit, pasi që çdo parti politike opozitare ka qenë e përfaqësuar sot në Kuvend. Unë kam qenë nga AAK dhe një deputete tjetër ka qenë nga PDK”, tha ajo.
Për zgjedhjen e presidentes, deputetja Reshitaj tha se është një moment historik për Kosovën, sepse siç tha ajo, për herë të dytë një grua bëhet presidente e vendit.
Ajo po ashtu tha se sot është dhënë një mesazh i jashtëzakonshëm në Kuvendin e Kosovës për vendin tonë. /I. Shabani/ KP