Reduktimet e rrymës, Tahiri: Test i mashtrimit, nëse durojmë 2 orë verës do mund të duronim edhe 12 orë dimrit

- in Lajme

Shefi i Grupit Parlamentar të Aleancës për Ardhmërinë e Kosovës, Besnik Tahiri, ka reaguar pas njoftimit se që nga dita e sotme do fillojë kufizimi i energjisë elektrike, raporton Gazeta Sinjali.

Përmes një postimi në rrjetin social Facebook, Tahiri ka thënë se ky është paralajmërim i një fushate psikologjike të Qeverisë Kurti.

Sipas tij, po bëhet një test i durimit dhe mashtrimit.

“Është thirrje që të bëhemi gati për një dimër të gjatë. Është test i durimit, është test i manovrimit, është test i mashtrimit. Po na matet pulsi, që nëse durojmë 2 orë verës, do të mund të duronim edhe 12 orë dimrit”, shkroi ai.

Tahiri ka thënë tutje se “kësaj duhet thënë stop tani, ndryshe do jetë vonë!”.

Ndryshe KEDS-i mbrëmë ka njoftuar se që nga mëngjesi i sotëm do të rikthehen reduktimet e energjisë elektrike.

Siç ka njoftuar KEDS, do të ketë 6 orë rrymë e më pas 2 orë reduktime.

Kjo ka bërë që të ketë reagime të shumta nga partitë opozitare që akuzojnë Qeverinë për keqmenaxhim, qytetarë e biznese.

Postimi i plotë i Tahirit:

/GazetaSinjali/