Pas zbulimit të rastit tronditës që ka ndodhur në fshatin Klinë e Epërme të Skenderaj, ku dyshohet se është dhunuar seksualisht një 72-vjeçare, Policia ka arritur të identifikojë dhe arrestojë personin e dyshuar, mëson Gazeta Sinjali.
Burimet nga Prokuroria ka bërë të ditur se bëhet fjalë për një 25-vjeçar, i cili sipas provave të siguruara deri më tani e ka keqtrajtuar seksualisht gruan e moshuar më 4 nëntor të këtij viti.
Sinjali ka raportuar se rastin në Polici e ka denoncuar një i afërm i 72-vjeçares, i cili ka njoftuar se ngjarja e rëndë dyshohet të ketë ndodhur në fillim të këtij muaji.
E moshuara është intervistuar nga hetuesit policorë, ku para tyre ka rrëfyer në detaje gjithë ngjarjen e tmerrshme me të cilën u përballë. Pas denoncimit të rastit, ajo është dërguar për ekzaminime mjekësore në Institutin e Mjekësisë Ligjore.
Me urdhër të prokurorit, rasti është cilësuar ‘Dhunim’, ndërsa i dyshuari është dërguar në mbajtje për 48 orë.