Qeveria e Republikës së Kosovës ka marrë vendim që lokalet e gastronomisë të shërbejnë ujë nga çezma për klientët e tyre. Çka do të thotë një vendim i tillë?
Rritja enorme e çmimeve edhe në sektorin e gastronomisë, ashtu si në sektorët e tjerë të ekonomisë së Kosovës mbetet e pasfiduar. Por, nga një gotë ujë do ta ketë si të drejtë të garantuar tashmë secili qytetar i Kosovës.
Ministri i Shëndetësisë, Rifat Latifi, ishte shprehur çuditshëm në arsyetimin e këtij vendimi duke e lidhur me “ujin e shëndetshëm” dhe të “sigurt për pije”.
“Me qëllim që të vendosim standardet normative të ujit për konsum njerëzor dhe në mënyrë që të mbrohet shëndeti i njerëzve që uji të jetë i pastër dhe i shëndetshëm në objektet e gastronomisë: në rastet kur objektet e gastronomisë furnizohet nga ujësjellësi publik, pronari i objektit nuk mund t‘iu ndalojë qytetarëve që të furnizohen me ujë nga rubineti; në rastet kur objekti i gastronomisë nuk furnizohet me ujë nga ujësjellësi publik, pronari i lokalit duhet ta respektojë nenin 7 dhe 8 të udhëzimit administrativ 10/2021 për ujë të destinuar për konsum njerëzorë dhe të pajiset me certifikatë të cilësisë së ujit nga IKSHPK dhe të njëjtën ta ekspozojë në lokal”, tha ministri Latifi.
Por, ky vendim megjithatë ka një histori pak më të gjatë.
Ishte ish drejtori i Kulturës në Komunën e Prishtinës dhe aktivisti i Vetëvendosjes, Yll Rugova, ai që kishte premtuar në kuadër të fushatës së tij se do të kërkonte që uji i pijshëm të shërbehej nëpër kafene.
“Uji është e drejtë, jo mall… Do të propozojmë iniciativën ku uji i pijshëm duhet të garantohet, e ku kafeteritë dhe lokalet do të kenë obligimin që të sjellin ujë falas për klientët e tyre. Uji është nevojë thelbësore e njeriut.” – ishte shprehur z. Rugova para gati tri vitesh.
Sidoqoftë, çështja më shqetësuese sa i përket sektorit të gastronomisë, siç u përmend më lart, është ajo e çmimeve të rritura dhe mungesës së inspektimeve të mjaftueshme në to.
Sa i përket ujit të pijshëm, shumica e kafeterive dhe lokale e kanë shërbyer atë madje edhe pa kërkesën e klientëve, derisa shumë pak prej tyre kanë refuzuar ta shërbejnë kur uji është kërkuar nga klientët.
Kryetari i Shoqatës së Gastronomëve të Kosovës, Petrit Kllokoqi, në një prononcim për gazetën Nacionale u shpreh përkrahës i këtij vendimi nga ana e Qeverisë së Kosovës.
“Na jemi në rregull për me i qitë ujë klientave. Shumica e lokaleve ju qesin edhe ashtu, mirëpo na po kërkojmë prej ministrisë çfarë uji… me i bo analizat, sepse në shumë lokale shkon uji i ndotur.”– u shpreh z. Kllokoqi.
Qeveria Kurti II në vazhdimësi është kritikuar nga opozita dhe një pjesë e shoqërisë civile për vendime të parëndësishme ndërkohë që sektori i gastronomisë ka qenë kritik sa i përket çështjes së mos-mbështetjes financiare gjatë karantinave që mësynin luftimin e përhapjes së pandemisë Covid-19./Nacionale