Rreziku nga qentë endacakë është evident tash e sa kohë në vendin tonë, ku një numër i qytetarëve kanë pësuar lëndime si pasojë e sulmeve nga ta. Një rast i ngjashëm ndodhi dje edhe në fshatin Tërnavc të Skenderajt, ku një 13-vjeçare është sulmuar nga qeni i fqinjëve të saj, raporton Gazeta Sinjali.
Burimet e Gazetës Sinjali brenda Emergjencës së Qendrës Kryesore të Mjekësisë Familjare në Skenderaj, kanë bërë të ditur se e mitura ka marrë trajtim mjekësor si pasojë e kafshimit nga qeni.
Ndërkohë është njoftuar edhe Policia të cilët kanë marrë deklaratat e viktimës dhe nënës së saj, të cilat kanë bërë të ditur se deri te incidenti ka ardhur pasi fëmijët kanë qenë duke luajtur me qenin e fqinjëve, i cili me pas ka këputur zinxhirin me të cilin ishte i lidhur dhe ka sulmuar 13-vjeçaren.
Po ashtu është intervistuar edhe pronari i qenit dhe me urdhër të prokurorit rasti është iniciuar ‘Shkaktim i rrezikut të përgjithshëm’.