Përveç sulmit ndaj punëtorit të KQZ-së me arsyetimin se nuk ka maskë, anëtari i Vetëvendosjes në Komisionin Qendror të Zgjedhjeve, nuk i kishte kursyer as ofendimet. Këtë e kanë treguar edhe dëshmitarët që kanë qenë në vendin e ngjarjes, kur Kurteshi e kishte sulmuar Adnon Berishën, punëtor në KQZ. Gazeta Nacionale ka siguruar aktakuzën e plotë ndaj Sami Kurteshit dhe sjell detaje.
Më 25 gusht të vitit 2021, anëtarit të Vetëvendosjes në Komisionin Qendror të Zgjedhjeve, Sami Kurteshit, i kishte dalë punë me një punëtor të KQZ-së. Shkak ishte bërë fakti që punëtori Adnon Berisha po lëvizte pa maskë në ndërtesën e KQZ-së. Pas kësja, kishte pasur sulmi dhe ofendimet nga Kurteshi. Të gjitha këto detaje janë zbardhur në aktakuzën e Prokurorisë së Shtetit ndaj Sami Kurteshit, e të cilën e ka siguruar gazeta Nacionale.
Aktakuza që daton më 20 dhjetor 2021, fillimisht tregon se pasi e kishte pyetur “djalo, ku e ki maskën?”, dhe i dëmtuari nuk përgjigjet,Kurteshi e kishte kapur për krahu duke e tërhequr dhe bërtitur “ec jashtë”, për ta shtyrë më pas me dy duart.
Ofendimet e rënda të Kurteshit
Në aktakuzën e plotë që e ka siguruar gazeta Nacionale, dëshmitari Shkëmb Krasniqi rrëfen se e gjithë ngjarja kishte ndodhur përderisa Adnon Berisha ishte duke i furnizuar me kafë disa nga kolegët.
“Aty ka hyrë Sami Kurteshi i cili ka filluar duke i bërtitur Adnonit për mos mbajtje të maskës duke i thënë: ‘a e din ti kush jam unë, me dashtë unë ti nuk punon këtu. Dil jashtë mos t’i shoh sytë’ dhe pastaj derisa Adnoni ishte me kafe në duar, Samiu fillon ta shtyjë fizikisht duke e larguar nga holli i zyrave të KQZ-së. Më tej shton se Samiu e ka shtyrë me duar dhe bërryla, goditje nuk ka pasur vetëm shtyrje”, thuhet në aktakuzën e Prokurorisë.
Një dëshmitar tjetër ka treguar për ofendime të rënda që ka thënë se Sami Kurteshi ia kishte bërë punëtorit të KQZ-së.
“Derisa ishte në objektin e KQZ-së ka dëgjuar një zhurmë në korridor dhe e ka parë Sami Kurteshin duke bërtitur me tone të larta dhe duke përdorur fjalë fyese si ‘qen, lopë, pis’. Këto ishin fjalët drejtuar njëri punëtor të sigurimit, të cilët kanë qenë te dera dhe pastaj e ka parë Sami Kurteshin duke e goditur me dy duar përnjëherë njërin nga dy djemtë që ishin në sigurim, dhe e ka shtyrë jashtë korridorit. Më tej shton se nuk e di arsyen pse ka ndodhur, por shton që Sami Kurteshi ka pasur tendencë ndaj këtij personi”,thuhet në pjesën tjetër të aktakuzës.
Një rrëfim të ngjashëm e ka dhënë edhe dëshmitari tjetër i ngjarjes, Kastriot Mustafa. “Ishte prezentë kur Sami Kurteshi filloi ta ngriste tonin ndaj zyrtarit të logjistikës, Adnon Berisha i cili ishte te aparati i kafes dhe në ato momente, Samiu i është drejtuar me fjalët dil jashtë dhe ka filluar ta shtyj Adnanin, i cili nuk ka rezistuar në asnjë formë dhe ka dalë jashtë objektit”.
Çfarë tha Kurteshi?
Anëtari i VV-së në KQZ, Sami Kurteshi në Policinë e Kosovës kishte thënë se personin që e ka sulmuar nuk e ka njohur. “Të njëjtit i është drejtuar me fjalët ‘djalo ku e kimaskën, vendose maskën se është e ndaluar me qëndru pa maskë. Dil jashtë’. Dhe i njëjti i ka thënë se nuk e vendosi dhe nuk dal jashtë. I dyshuari me me zë të lartë i ka thënë ‘ti duhet të dalësh jashtë’, dhe ka shkuar afër tij dhe dorën ia ka vendosur në shpinë dhe i ka thënë dil jashtë’”, bëhet e ditur në aktakuzë.
Adonon Berisha të cilin e kishte sulmuar Sami Kurteshi, në deklarën e tij kishte thënë se Kurteshin nuk e ka mbikëyrës.
“A po merr vesh ti, me ty jam tu fol. Atëherë i dëmtuari i është përgjigjur me fjalët ‘vetëm të shërbej me kafe dhe vazhdoj me procedurat e mia të punës’. Atëherë i dyshuari e kap për krahu duke e tërhequr dhe duke i bërtitur, dhe duke e shtyrë nga prapa me shumë fuqi duke e lëvizur nga vendi, kurse i dëmtuari nuk ka rezistuar pasi dy duart i ka pasur të zëna, e ka nxjerrë jashtë dhe i ka thënë ‘nuk guxon me hi brenda’”.
Përveç kësaj aktakuze, gazeta Nacionale raportoi një ditë më parë për padinë që ish-kryetarja e KQZ-së, Valdete Daka ia ka bërë Sami Kurteshit për shpifje. Daka po ia kërkon Kurteshit 100 mijë euro për dëmtim imazhi./Nacionale