Korporata Energjetike e Kosovës [KEK] nuk ka treguar nëse do të anulohet konkursi për 150 pozita pavarësisht raportimeve se aty u punësuan persona me libreza partiake të Vetëvendosjes dhe familjarë të të punësuarve aktual në KEK.
Në një njoftim për media, nga KEK, kanë thënë se vetëm po i përcjellin, siç u janë referuar raportimeve, ‘pretendimet publike’ lidhur me shkeljet ‘eventuale’ në rekrutimin për pozitat e punës.
“Pavarësisht faktit se KEK ka bërë përpjekje për të respektuar kriteret e shpalljes publike si dhe dispozitat ligjore të Ligjit të Punës në fuqi dhe detyrimeve ligjore të dala nga aktet nënligjore për çështjen e rekrutimit të punëmarrësve, KEK është duke përcjellë me seriozitet të gjitha pretendimet publike rreth shkeljeve eventuale gjatë procesit të rekrutimit. Në këtë drejtim, KEK ju siguron se të gjithë ankesat do të shqyrtohen me kujdesin më të madh, duke rishikuar procesin, do të korrigjohen gabimet e evidentuara si dhe do të merren masa adekuate konform ligjit, kudo që do të ketë pasur shkelje në proces”, thuhet në reagim.
Me tej, KEK ka bërë të ditur se janë respektuar të gjitha procedurat duke treguar se edhe 17 pozita janë të paplotësuara.
“Korporata Energjetike e Kosovës njofton opinionin se pas përfundimit të procedurave të rekrutimit sipas shpalljes publike për plotësimin e 150 pozitave të lira, ku kishin aplikuar 4668 kandidat, janë publikuar rezultatet përzgjedhjes për 128 pozita. Ndërsa për 17 pozita ende të pa plotësuara vazhdon procedura e rekrutimit si dhe për 5 pozita për të cilat nuk kemi pasur kandidat të suksesshëm, do të rishpallen në një të ardhme të afërt”, thuhet në komunikatën e KEK-ut.
“Lidhur me këtë, KEK inkurajon çdo aplikues që konsideron se i janë shkelur të drejtat e garantuara me dispozita ligjore, të parashtrojë ankesë brenda afatit ligjor në komisionin e ankesave”, përfundon komunikata.
Ndërkohë, Nacionale raportoi për punësimet e anëtarëve të VV-së në KEK. Shumica e të punësuarve dolën të jenë nga kjo parti që ka pushtetin në Kosovë.
Kujtojmë që KEK-u së fundmi ka hapur një konkurs të ri, ku ngjashëm si qeveritë paraprake, edhe kjo e Kurtit nuk e ka lëshuar mundësinë t’i pranojë në punë njerëzit e vet.
Tjetër premtim i Qeverisë Kurti u shkel me punësime në KEK, pasi kishte thënë se nuk ka punësime me libreza të partisë dhe familjarët janë për dasmë.
Një ndër të punësuarit, Florent Berisha, është mik shpie i Halil Thaçit – deputet dhe kandidat për kryetar të Obiliqit nga Vetëvendosje.
Rrogë të KEK-ut do të marrë edhe vellai i shefit të VV-së në Kuvendin e Obiliqit – Sami Ahmetit. Pos tij, me punë të shtetit është shpërblyer edhe Ermal Berisha – shef i shtabit zgjedhor në zgjedhjet lokale si dhe të punësuar të tjerë që mund t’i gjeni në linkun më poshtë. Këtu mund të lexoni raportimin e Nacionales për punësimet.
Opozita kërkon anulimin e konkursit
Pas raportimeve për punësime të aktivistëve të LVV-së në KEK, subjektet opozitare kanë kërkuar anulimin e këtij konkursi.
Aktivisti i PSD-së, Nol Nushi, ka thënë se deri më tani ka bazë të mjaftueshme për anulim dhe hetim të këtij konkursi.
“KEK ka shpallë konkurs për 128 vende të lira pune. Për këto pozita, kanë qenë 4668 aplikime. Veç 128 janë pranuar, 2.7% e aplikantëve. Shumica e të pranuarve janë militantë të VV-së ose familjarë të zyrtarëve të KEK. Plot prej tyre nuk kanë shkollë të mesme adekuate. Ky konkurs duhet me u anulu, dhe me fillu hetimet”, ka shkruar Nushi në profilin e tij në Facebook.
Edhe deputetja e Lidhjes Demokratike të Kosovës, Vlora Dumoshi, ka reaguar pas punësimeve të njerëzve të Vetëvendosjes në KEK.
Në profilin e saj në “Facebook”, ajo ka shkruar se LVV-ja ka filluar kapjen e kësaj kompanie publike.
“Tash e tutje, KEK prodhon punësimin e familjarëve të Lëvizjes Vetëvendosje! Trafostacioni i parë i qeverisë Kurti pas një procesi transparent hapi dyer të reja, për axhallarët e dajët në kapjen e Korporatës Energjetike të Kosovës. Tani, distribucionet e KEK-ut, fillojnë nga selia qendrore e Albin Kurtit. Në çdo vend ky titull mban emrin KAPJE. Asnjë kalkulim për 12 muaj nuk po ua ndal armatën e kushërinjve. Kjo bandë me mburrje trajton rritjen ekonomike në Republikë. Në rrethana si këto, Kosova s’ka veçse qeveri!”, ka shkruar Dumoshi./Nacionale