Ish-deputeti i Kuvendit të Kosovës, Nuredin Lushtaku, është dërguar në mbajtje me urdhër të prokurorit kujdestar të Prokurorisë Themelore të Mitrovicës.
Gjatë ditës së djeshme, për plagosjen e dy policëve në Skenderaj janë ndaluar edhe dy familjarë të Lushtakut, teksa prokuroria ka bërë kërkesë në gjykatën kompetente për caktimin e paraburgimit ndaj tre të dyshuarve.
TV Dukagjini ka siguruar pamje ku ai shihet i prangosur.
Gazeta Sinjali ka raportuar ekskluzivisht ditën e ndodhjes së rastit kur për një shkëmbim zjarri mes Policisë dhe disa personave që ka ndodhur rreth orës 00:30 në Skenderaj dy zyrtarë policorë kishin mbetur të plagosur, me ç’rast janë dërguar me urgjencë në Qendrën Klinike Universitare të Kosovës për ndihmë mjekësore.
Sinjali mësoi ekskluzivisht nga burimet se personat e dyshuar për plagosjen e policëve janë gjenerali Nuredin Lushtaku, dy djemtë dhe vëllezërit e tij.
Gazeta Sinjali gjithashtu siguroi edhe detajet e reja se si ka ndodhur ngjarja dhe si nis sherri në një pikë kontrolli./Sinjali