Në një aeroplan drejt Hagës që do ta marrë rrugë nga Kosova, pritet të jetë edhe ministrja e drejtësisë, Albulena Haxhiu. Ajo bashkë me nënkryetaren e Kuvendit, Saranda Bogujevci, kryetarin e komisionit për legjislacion, Adnan Rrustemi, e deputetin Erxhan Galushi, do të udhëtojnë drejt Holandës. Kjo me qëllim që të takojnë ish-pjesëtarët e Ushtrisë Çlirimtare të Kosovës që po gjykohen në Dhomat e Specializuara.
Haxhiu bashkë me udhëheqësit e Kuvendit do të qëndrojnë në Hagë më 30 e 31 mars, dhe 1 prill. Por, nga 8 ish-pjesëtarë të UÇK-së, ata do të takohen vetëm me gjashtë prej tyre. Kjo pasi ish-presidenti Hashim Thaçi e ish-kryeparlamentari Kadri Veseli kanë refuzuar ftesën. Gazeta Nacionale ka mësuar se Thaçi dhe Veseli, nuk janë përgjigjur pozitivisht në ofertën që u ka shkuar për takim nga Minsitria e Drejtësisë. Kjo është konfirmuar edhe nga vetë kabineti i ministres Haxhiu.
“Ministrja e Drejtësisë, Albulena Haxhiu, së bashku me nënkryetaren e Kuvendit, Saranda Bogujevci, kryetarin e Komisionit për Legjislacion, Adnan Rrustemi, si dhe deputetin Erxhan Galushi, do të qëndrojnë në Hagë me qëllim të takimit me personat që po mbahen në paraburgim. Vizitat do të zhvillohen më datë, 30, 31 mars, dhe 1 prill. Delegacioni nga Republika e Kosovës do të takohet me Jakup Krasniqin, Rexhep Selimin, Hysni Gucatin, Nasim Haradinajn dhe Pjetër Shalën”, kanë thënë nga kabineti i Ministrisë së Drejtësisë për gazetën Nacionale.
Kjo nuk është hera e parë që disa nga të akuzuarit e refuzojnë ftesën për takim me delegacionin e Ministrisë së Drejtësisë. Një gjë e tillë kishte ndodhur edhe në shtatorin e vitit 2021, kur përveç Thaçit e Veselit, edhe Nasim Haradinaj kishte refuzuar ftesën për takim. Kjo me arsyetimin se vizita e delegacionit po u merret nga koha e vizitës familjare.
Megjithatë, njëjtë pritet të ndodhë edhe këtë herë. Kjo pasi nga Dhomat e Specializuara në Hagë, kanë lënë të nënkuptohet se vizita e ministres Haxhiu për të akuzuarit është personale, dhe nuk llogaritet si vizitë zyrtare. Si rezultat, minutat me Haxhiun, të akuzuarve u merren nga vizitat personale.
“Për arsye të privatësisë, ne nuk mund të ofrojmë informacion në lidhje me kërkesat specifike të vizitorëve ose vizitat e të paraburgosurve. Si çështje e përgjithshme, Udhëzimi mbi Vizitat dhe Komunikimet bën dallimin ndërmjet vizitave personale dhe vizitave speciale. Vizitat speciale përfshijnë ato nga Ombudspersoni i Dhomave të Specializuara dhe Komiteti Ndërkombëtar i Kryqit të Kuq, si dhe vizitat konsullore, vizitat e një gjyqtari, Sekretarit ose anëtarëve të stafit që veprojnë në emër të tyre. Të gjitha vizitat e tjera trajtohen si vizita personale”, thuhet në përgjigjen e Gjykatës Speciale.
Pse ky refuzim?
Në fakt, arsyet mund të jenë të shumta. Një burim i afërt nga Thaçi e Veseli i kishte thënë Nacionales, se nëse vizita rastis të jetë në ditën kur të akuzuarit kanë konsulta me avokatët, atëherë pranimi i delegacionit të MD-së do të jetë i pamundur.
Por, ky duket të jetë vetëm një arsyetim. Akuzat që ndër vite kishte bërë ministrja Albulena Haxhiu bashkë me shefin e saj, tashmë kryeministrin Albin Kurti, ndaj Thaçit e Veselit, duket se nuk janë harruar nga këta dy të fundit. Por, le t’i shkojmë me radhë.
Në një nga seancat tensionuese në Kuvendin e Kosovës para 6 vitesh, kishte eskaluar në ofendime një përplasje ndërmjet kryetarit të Kuvendit aso kohe, Kadri Veseli, me deputeten Albulena Haxhiu. Në kohën kur hidhej gazi, Haxhiu i ishte drejtuar Veselit me fjalët: “ti je kriminel”. Një frazë të tillë, Haxhiu e kishte thënë edhe për ish-presidentin Hashim Thaçi. Madje në një postim publik ku e kritikonte një shtrëngim duarsh ndërmjet Shpend Ahmetit dhe Thaçit. Postim i cili duket se kohë më vonë, ishte fshirë dhe nuk mund të gjendet në rrjetet sociale të Haxhiut.
“Shpendi dukej në siklet në ato fotografi të asaj situate të mbrëmshme. Pra, nuk dukej aspak i kënaqur. Por, mendoj që është dashur ta gjejë forcën e të mos ia japë dorën Thaçit. Ajo përshëndetje e ndihmon Thaçin. Nuk është dashur assesi t’ia shtrijë dorën një krimineli. Thaçi është përgjegjësi kryesor për mjerimin ekonomik, politik e social në Kosovë. Është kriminel e tradhtar”, shkruante Haxhiu në Facebook, postim ky që tashmë nuk figuron askund në llogarinë e saj.
Përplasjet e tilla ishin të shpeshta ndërmjet pushtetit të asaj kohe që udhëhiqej nga Thaçi e Veseli, me opozitën e Albin Kurtit. Megjithatë, të gjithë e mbajnë mend kur Albin Kurti në një postim në facebook jo shumë ditë para se t’i ngritej aktakuza, i kishte thënë Thaçit më shumë se 40 herë “Shko në Hagë Hashim”.
“Po pra, shko Hashim. Në Hagë thuaje fjalën tënde me argumente e fakte, në mbrojtje të luftës çlirimtare, të UÇK-së, të shqiptarëve e të historisë sonë. Të takon. Je historiani që ishe në luftë. Bëhu presidenti që hyn në histori. Shko Hashim. Burgu nuk është tragjedi dhe fatal. Sidomos ky i Hagës. Besoj që Ramushi, Fatmiri e Batoni, të kanë treguar: aty ka televizor, ushqim të mirë tri herë në ditë, salla për rekreacion dhe libra të panumërt në bibliotekë të pasur. Nuk të ndodh asgjë e keqe atje, përveç faktit që do të kesh kohë të përballesh me ndërgjegjen tënde, të cilën kushedi sa vite ka që nuk e takon më. Shko Hashim”, thuhej në postimin që Kurti e kishte bërë më 9 janar 2019.
Se këto kanë ndikuar që Thaçi e Veselit ta refuzojnë takimin me pushtetin, e kishte thënë vetë ish-presidenti gjatë një takimi me gazetarin nga Shqipëria, Mero Baze.
“Ato nuk erdhën të interesohen për ne, por donin të përdornin takimin me mua, në kulmin e fushatës elektorale në Kosovë. Qeveria e Kosovës nuk na ndihmoi duke na sjellë kafe apo duke na pyetur a na dhemb koka këtu ku jemi. Këto i sigurojmë vetë. Ata na ndihmojnë me qëndrime publike, por pikërisht nga këto qëndrime na kanë dëmtuar sa kanë mundur. Përveç qeverisë së Shqipërisë, askush nuk na ka ndihmuar”, citohet nga Baze të ketë thënë ish-presidenti.
Deputetja e PDK-së, Ganimete Musliu, ka kërkuar që para nisjes në Hagë, Haxhiu t’u kërkojë falje Thaçit e Veselit.
“Albulena Haxhiu para se të niset në Hagë do të duhej fillimisht t”i kërkonte publikish falje Hashim Thaçit dhe Kadri Veselit që i quajti kriminelë. Nëse nuk kërkon falje publike, kërkesa për t”i takuar liderët e UÇK-së është e pakuptimitë dhe e padrejtë.”
Çfarë thonë tash Haxhiu e Kurti?
Megjithatë, qëndrimet e kryeministrit Kurti e ministres Haxhiu, janë ndryshe tash si pushtetarë. Në një intervistë në transmetuesin publik të Kosovës, Kurti tha se nuk e di mendimin që e kanë të akuzuarit në Hagë për të. Megjithatë, pas një kohe të gjatë, vendosi t’i thotë disa fjalë për ata edhe pse pa ua përmendur emrat.
“Së pari nuk besoj në formulimin ndërmarrje e përbashkët kriminale, ky është pretendim i prokurorisë, të cilin unë nuk e besoj, së dyti kur thuhet ndërmarrje e përbashkët kriminale, nga marsi i viti 1998, kur ne e kemi epopenë e UÇK-së, kjo e bën edhe më të pabesueshme këtë etiketë, dhe së treti u zgjat paraburgimi shumë. Së shpejti bëhet një vit e gjysmë në paraburgim, edhe unë kam qëndruar shumë, edhe në kohën e okupimit të Serbisë dhe pasluftës, kur ishim si robër lufte”, është shprehur Kurti.
Akuzat e saj ministrja Haxhiu kishte thënë se i takojnë vetëm përballjeve të pasluftës, pasi sipas saj, lufta e UÇK-së ka qenë çlirimtare. Kështu nuk thoshte megjithatë, sa ishte në opozitë.
“Me Thaçin e Veselin kemi probleme politike të pasluftës. Tek e fundit ata janë ushtarë të UÇK-së, për çka ne i përkulemi kontributit të ushtarëve të UÇK-së që Kosova sot të jetë e çliruar dhe e pavarur… Asnjëherë nuk i kam kritikuar ata për kohën e luftës. Problemet tona politike nuk më bëjnë që unë të mos bëj kërkesë për takim me ta”, kishte thënë Haxhiu.
Refuzim apo takim me të tjerët, efekti në praktikë i kësaj vizite nuk është se ka ndonjë peshë të madhe./Nacionle