Javën që lamë pas komuna e Prishtinës, gjatë dy ditëve të vikendit po testonte disa rrugë, duke i bërë ato njëkahorë. Si qëllim që të krijohet më shumë hapësirë për këmbësorë e çiklistë.
E pas këtij testimi, nga komuna në një intervistë për RTK-në, nënkryetari i Prishtinës, Alban Zogaj thotë se shpejtë pritet të funksionalizohet ky plan.
“Do të kemi një ridizajnim të komplet qarkullimit dhe komunikimit në Prishtinë. Edhe shumë qytete të tjera të botës funksionojnë në forma të tilla, pra bëjnë qarkullim njëkahor, sidomos të qarkoreve të brendshme në mënyrë që ti japin një lëvizje më të shpejtë qarkullimit ose komunikacionit të veturave dhe mjeteve tjera” thotë Zogaj.
Sipas tij 70 për qind e qytetarëve nuk përdorin vetura, andaj po mendohet t’i jepet hapësirë atyre që nuk vozisin.
“Shumica e qytetarëve të Prishtinës e kanë mirëpritur këtë funksionim të ri të komunikacionit sepse lirohet hapësira publike dhe një prej kërkesave kyçe të qytetarëve të Prishtinës është që të lirohen hapësirat publike për ecje, për të dalë me fëmije për të krijuar parqe urbane, e kjo na jep mundësi për ti krijuar këto parqe urbane””, tha ai.
Testimi i qarkores një kahëshe sipas Zogajt ka qenë i suksesshëm, sepse nga ky testim janë grumbulluar të dhëna të cilat do të ndikojnë në vendimin final për mënyrën e funksionimit të komunikacionit.