Konsumimi i substancave narkotike është një dukuri negative e cila ka prekur një numër të madh të të rinjve në të gjitha qytetet e Kosovës. Nuk janë të rralla rastet kur ata që posedojnë substanca të tilla janë edhe të mitur. Shpesh familjarët detyrohen t’i denoncojnë, siç ka ndodhur dje me një rast në Prishtinë, shkruan Sinjali.
Këtë herë, një gjyshe 71-vjeçare ka vendosur ta raportojë nipin 16-vjeçar, pasi ia gjeti një qese me marihuanë në xhep. E shqetësuar për nipin, ajo vendosi të kërkojë ndihmë nga Policia.
Burimet nga Prokuroria kanë bërë me dije se si rezultat i denoncimit, i dyshuari është shoqëruar në Policia, ku ka dhënë deklaratë para hetuesve policorë.
Me urdhër të prokurorit, ndaj tij është iniciuar rasti “Posedim i paautorizuar i substancave narkotike, psikotrope apo analoge’.
Ndryshe, sipas Kodit Penal të Kosovës, është e jashtëligjshme që qytetarët të blejnë, posedojnë apo shpërndajnë substanca narkotike dhe mund të dënohen me gjobë apo burgim, varësisht nga sasia dhe lloji i lëndës narkotike që iu kapet nga autoritetet e rendit.