Presidenti i zgjedhur i Republikës së Shqipërisë, Bajram Begaj, ka mbërritur në Kosovë për vizitën e tij të parë zyrtare, raporton Gazeta Sinjali.
Ai u prit me nderime të larta shtetërore nga presidentja e vendit, Vjosa Osmani Sadriu.
Pas ceremonisë së pritjes, Osmani do të zhvillojë takim me Begajn, si dhe në fund të takimit do të kenë deklaratë të përbashkët për media.
Ndërkaq, Policia ka njoftuar se gjatë vizitës së presidentit të Shqipërisë, Bajram Begaj në Kosovë, nga data 14 deri më 16 gusht, do të kujdeset për ofrimin e sigurisë dhe mirëmbajtjen e rendit e qetësisë publike gjatë kohës së lëvizjes së eskortës dhe qëndrimit të delegacionit shtetëror në Kosovë.
Sipas njoftimit, për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes, Policia e Kosovës do të bëjë ndërprerje të përkohshme të qarkullimit të trafikut (në intervale të shkurta kohore), të disa segmenteve rrugore ku pritet të kalojë eskorta, si dhe në lokacione të caktuara ku parashihen të realizohen aktivitete zyrtare.