Kombëtarja e Kosovës e kishte sot mysafir kryeministrin e vendit Albin Kurtin, i cili zhvilloi biseda me futbollistët dardanë, dhe përveç kësaj, ai u takua me presidentin e Federatës së Futbollit të Kosovës, Agim Ademin.
Presidenti Ademi shfrytëzoi rastin që t’ia dhuronte kryeministrit Kurti një fanellë të dardanëve, ku gjatë takimit ishin prezent edhe trajneri i Kombëtares Bernard Challandes, nënkryetari Bakir Burri, drejtori i Kombëtares Muharrem Sahiti, dhe kryetari i grupit të tifozëve “Dardanët” Lulzim Berisha, përcjell KosovaPress.
Kurti iu uroi djelmoshave dardanë fat në ciklin e kualifikimeve për në Botërorin “Katar 2022”, dhe tregoi që futbolli në Kosovë ka qenë edhe është sport i dashur, ku tani sukseset e lojtarëve tanë janë duke e bërë krenar shtetin e Kosovës.
Kurse, portieri Samir Ujkani falënderoi Kurtin, institucionet dhe tërë popullin, për përkrahjen e madhe që janë duke ia ofruar ekipit kombëtar, ku premtoi që tërë skuadra do të jap maksimumin për fanellën e shenjtë dardane./KP