Policia e Kosovës ka dhënë detaje se çka është konfiskuar gjatë një aksioni në veri të Mitrovicës.
Zëvendësdrejtori i Policisë së Kosovës për rajonin e veriut, Veton Elshani tha për Reporteri.net se kanë konfiskuar një sirenë të alarmit dhe 6 zmadhues të zërit, të cilat në periudha të ndryshme kanë shërbyer për prishje të rendit publik.
“Konfirmojmë konfiskimin e një sirene të alarmit dhe 6 zmadhues të zërit në Mitrovica Veri. Kjo sirenë dhe këta zmadhues zëri kanë shërbyer në periudha të ndryshme kohore për të prishje të rendit dhe qetësisë publike”, ka thënë Elshani.
Sirenat në veri të Kosovës rëndom lëshohen nga strukturat paralele serbe kur nga popullata lokale kërkohet të organizohet për ndonjë ngjarje.
Sa herë që bien sirenat në veri të Kosovës, e që ka ndodhur në disa raste vitet e kaluara, grupe njerëzish të organizuar dalin në rrugë, mbyllin dyqanet, barnatoret, lokalet afariste e të tjera dhe organizojnë barrikada.
Kështu ndodhi edhe në maj të këtij viti, kur në komunat në veri serbët u mblodhën për të protestuar kundër vendosjes së kryetarëve shqiptarë në ndërtesat komunale në këto komuna, duke eskaluar edhe në protesta të dhunshme.
Për pasojë më shumë se 90 pjesëtarë të misionit të NATO-s në Kosovë u plagosën.
Si pjesëmarrës kryesorë në sulmet kundër KFOR-it, autoritetet e Kosovës i emëruan pjesëtarët e organizatave “Mbrojtja Civile” dhe “Brigada e Veriut” – që të dyja të shpallura terroriste nga Prishtina zyrtare./Demokracia