Punët e mira të bëra nga Qeveria Mustafa e Hoti do të kenë ndikim te qytetarët që Lidhja Demokratike e Kosovës të fitojë këto zgjedhje. Kështu vlerëson anëtari i Këshillit të LDK-së, Avdi Pireva, i cili shton se entuziazmi i qytetarëve që po hasin në teren dëshmon më së miri një gjë të tillë.
Pireva në një intervistë për KosovaPress shprehet kritik për debatet televizive, për të cilat thotë se kanë për qëllim që të ulin LDK-në. Megjithëkëtë, ai shprehet i bindur se me punët e LDK-së në qeverisjet e kaluara LDK do të dalë shumë mirë në zgjedhjet e 14 shkurtit.
Sipas tij, ëshë tendencë e grupeve të caktuara që LDK-në ta paraqesë si fajtore për gjithçka pa i numëruar punët e mira.
Pireva: Të gjitha debatet, janë të drejtuara për ta ulur LDK-në
Video
“LDK ka bërë punë të mëdha, edhe Qeveria Hoti, edhe Qeveria Mustafa, pra është qeveri e pa korruptuar, pa asnjë aferë korruptive dhe pa asnjë skandal, prandaj këtë e ka parasysh qytetari. Ne nuk bazohemi nëpër studio televizive dhe nëpër njerëz që paguhen apo që janë të prirë për t’i kthyer shtizat nga LDK-ja. Të fortit sulmohen. Të gjitha debatet janë të drejtuara për ta ulur LDK-në dhe për ta bërë atë si fokus të grupeve që LDK është fajtorja për këtë që është sot Kosova, për papunësi. Askush nuk i përmend të arriturat që kanë ndodhur në qeverisjet e LDK-së e ato janë në numër të shumta”, thotë ai.
Me logon “Shteti, shtet”, Pireva thotë se synojnë të zhvillojnë vendin duke u ofruar qytetarëve jetë të dinjitetshme.
Ish-sportisti Avdi Pireva thotë se edhe sporti sikur fushat e tjera duhet të jetë i lidhur me politikën, porse kjo e fundit nuk duhet të ndikojë në sport.
Ai rendit disa nga të arriturat e qeverisjes Hoti, teksa shton se punët e mira të LDK-së janë garanci për mbështetjen që LDK do të marrë në zgjedhjet e 14 shkurtit.
Pireva: LDK ka bërë Ligjin për sponsorizime
Video
“Në çdo qeverisje të LDK-së, sporti dhe sportistët kanë përfituar shumë. Duke filluar prej infrastrukturës në kuptimin e objekteve sportive, infrastrukturës ligjore që është shumë e rëndësishme për të avancuar sportin, pra kemi bërë Ligjin për sponsorizime dhe Ligjin për sportin, kategorizimin e sportit. Dhe, të gjitha këto janë rezultat i punës së LDK-së dhe ekspertëve të saj”, thotë ai.
Premtimi kryesor që ka për qytetarët e Kosovës, kandidati për deputet nga radhët e LDK-së, Avdi Pireva është ngritja e kapaciteteve infrastrukturore sportive.
Ai premton se do të angazhohen për edukim fizik në shkolla dhe universitete, duke ngritur numrin e orëve mësimore e njëherësh duke futur si lëndë mësimore në të gjitha fakultetet.
Pireva: Me LDK-në do të ngrisim kapacitetet infrastrukturore
Video
“Ajo që duhet të ndodhë është që politika mos të interferojë në sport. Me LDK përpara, ne do të ngrisim kapacitetet infrastrukturore dhe do të bëjmë infrastrukturë moderne sportive, do të zgjerojmë hapësirat për sporte rekreative që është shumë me rëndësi në ditët e sotme dhe do të angazhohemi për edukim fizik në shkolla dhe universitete. Do të angazhohemi që në shkolla të ngrisim numrin e orëve të edukatës fizike, prej 2 në 3, plus një teori për vetëdijësim dhe në universitete që secili fakultet të ketë një apo dy orë të edukatës fizike”, thekson Pireva.
Avdi Pireva garon për deputet në Kuvendin e Kosovës në zgjedhjet e 14 shkurtit nga radhët e Lidhjes Demokratike të Kosovës, me numrin 68./N.Jakupi/ KosovaPress