Trajtimi i personave me çrregullime mendore mbetet sfidë kryesore në trajtimin e të burgosurve në Kosovë. Për momentin brenda institucioneve korrektuese nuk ka institucion të veçantë për trajtimin e personave me çrregullime mendore, por ata qëndrojnë në të njëjtin pavijon me të burgosurit e tjerë. “Vitin e kaluar kemi pasur tri raste të vetëvrasjeve dhe të tri viktimat kanë qenë persona me çrregullime mendore dhe kjo për ne paraqet shqetësim”, ka thënë Fatmire Haliti, nga Qendra Kosovare për Rehabilitimin e të Mbijetuarve të Torturës.
Haliti tha se personat me çrregullime mendore, përveç mungesës së ofrimit të shërbimeve psikiatrike të vazhdueshme në qendrat korrektuese të Kosovës, kanë edhe rrezikun e mundshëm ku përfshihen me vetëlëndimet dhe vetëvrasjet.
“ Personat me çrregullime mendore janë të vendosur në të gjitha institucionet korrektuese, sepse për ta nuk ka një vend të caktuar ku të trajtohen”, ka thënë Fatmire Haliti nga Qendra Kosovare për Rehabilitimin e të Mbijetuarve të Torturës.
“Fatkeqësisht kemi një numër të lartë të personave me çrregullime mendore që janë nëpër burgjet e Kosovës, dhe Kosova nuk ka institucion të veçantë për trajtimin e tyre. Me shqetësuesja është se gjatë vitit 2021 kemi pasur tri vetëvrasje të personave me çrregullime mendore që janë nëpër burgjet e Kosovës”, tha ajo për Radio Kosovën.
Ndërsa, Bexhet Shala, nga Këshilli për Mbrojtjen e të Drejtave dhe Lirive të Njeriut, tha për Radio Kosovën se shërbimi shëndetësor i burgjeve bën përpjeke që të kujdeset për personat që kanë çrregullime mendore, por nuk ka kapacitet të mjaftueshëm profesional që t’i trajtojë nevojat që i kanë.
“Nuk kanë kapacitete që t’i trajtojnë rastet e rënda me çrregullime mendore, gjykatat janë krejtësisht jo serioze ndaj këtyre rasteve, nuk i lirojnë, nuk marrin vendim lirues, por nuk ka edhe bazë ligjore deri më tani që personat që kanë çrregullime të rënda mendore të ndërpritet dënimi apo të dërgohen ne shërim jashtë institucioneve korrektuese”, tha Shala.
Ndërsa nga Ministria e Drejtësisë thonë se në bashkëpunim me Ministrinë e Financave kanë ndarë buxhet për të rinovuar pavijonin ‘D’ në qendrën korrektuese në Dubravë, ku do të sistemohen mbi 50 të dënuar të kësaj kategorie.