Në Prishtinë sot po bëhet testimi i tretë i qarkores së brendshme, e që ka krijuar tollovi të mëdha në trafik.
Ndërkohë kryetari i komunës së Prishtinës, Përparim Rama, është i pranishëm në përmbylljen e festivalit Manifesta Biennal.
Klan Kosova raporton që Rama, duke iu adresuar drejtoreshës së këtij festivali, kishte thënë që “sot ndoshta jam njeriu më i urryer në Prishtinë”.
Në njoftimin e komunës ishte thënë se testimi do të bëhet nga dita e premte deri të dielën.
“Qarkorja njëkahëshe gjatë këtyre ditëve do të jetë funksionale në drejtim të rrugëve: – Rruga “Agim Ramadani”që nga semaforët pranë ish-menzës së Studentëve e deri te rreth-rrotullimi prapa ndërtesës së Komunë – Rruga “UÇK” nga Parlamenti e deri te ish-Kino Rinia. – Rruga “Migjeni” deri te ndërtesa e ish-OSBE, Rruga “Luan Haradinaj” deri te semaforët pranë Bankës Qendrore, Rruga “Ukshin Hoti” dhe Rruga “Robert Doll””, kishte njoftuar Komuna.
Komuna kishte thënë se i gjithë procesi do të bëhej në bashkëpunim me Policinë e Kosovës, derisa u kishte bërë thirrje qytetarëve për durim.