Ka përfunduar mbledhja e jashtëzakonshme e Komisionit Qendror të Zgjedhjeve e cila u mbajt me dyer të mbyllura. Temë e diskutimit ishte zgjedhjet në katër komunat në veri të Kosovës.
Burime nga KQZ kanë thënë për Sinjalin se nuk kanë pranuar rekomandime për shtyrje të zgjedhjeve të jashtëzakonshme në Veri të vendit.
I njëjti burim tha se në takim janë dhënë informata shtesë për organizimin e zgjedhjeve.
Po ashtu, ky burim bën të ditur se anëtarët e KQZ-së kanë kundërshtuar mbajtjen e mbledhjes me dyer të mbyllura.
Ndryshe, sipas rregullores të KQZ-së mbledhjet e këtij institucioni mbahen të hapura për publikun në përjashtim kur flitet për çështje në lidhje me personelin e KQZ-së dhe SKQZ-së.
Është paralajmëruar që zgjedhjet për katër komunat në veri të Kosovës të mbahen më 18 dhjetor të këtij viti, mirëpo për shkak të tensionimit të situatës atje, tani po shqyrtohet që këto zgjedhje të mbahen në një kohë më të përshtatshme.
Lista Serbe e cila është dorëhequr nga institucionet për shkak të iniciativës së Qeverisë së Kosovës që të shqiptohen gjoba për vozitësit me targa ilegale, ka bërë thirrje që të bojkotohen këto zgjedhje.
Mbrëmë persona të maskuar kanë hapur zjarr mbi një veturë të Policisë së Kosovës, ku si pasojë një polic është plagosur.
Komuniteti ndërkombëtar i ka bërë thirrje Qeverisë së Kosovës që këto zgjedhje të shtyhen për një kohë më të përshtatshme.