Më 4 prill 2021, Kuvendi i Kosovës u mblodh për të zgjedhur presidenten e vendit dhe kandidate për këtë pozitë ishte Vjosa Osmani.
Vjosa Osmani u zgjodh presidente e Kosovës, me 71 vota pro.
Për zgjedhjen e presidentes u zhvilluan tri raunde votimi. Në dy raundet e para të votimit, Osmani nuk e mori numrin e mjafueshëm prej 2/3 të votave, por në raundin e tretë, në bazë Kushtetutës, nevojiteshin të paktën 61 vota.
Osmani arriti që në raundin e tretëtë votimit të sigurojë ulësen e presidentes. Në këtë raund, votuan 82 deputetë, 71 ishin për, ndërsa 11 vota ishin të pavlefshme. E kundërkandidati i saj, Nasuf Bejta, nuk mori asnjë votë të vetme.
Ishin dy deputetë të pakicave joserbe, ata që e siguruan kuorumin mbi 80 deputetë në sallë për t’ia mundësuar Osmanit që në raundin e tretë të zgjidhet Presidente e Kosovës.
Vjosa Osmani pasi u zgjodh iu drejtua deputetëve me një fjalim.
Ajo në fjalimin e saj dha një porosi për vajzat dhe gratë anembanë vendit, duke u thënë se gjithçka është e mundur kur ato ëndërrojnë dhe punojnë për realizimin e ëndrrave të tyre.
Osmani vlerësoi lart edhe veprën e ish-presidentit të Kosovës, Ibrahim Rugova, veprën e komandantit të Ushtrisë Çlirimtare të Kosovës, Adem Jashari, të gjithë dëshmorëve të kombit dhe sakrificën e të gjithëve për ta krijuar shtetin.
“Sot ne kujtojmë rolin e arkitektit të shtetit tonë, Ibrahim Rugovës, i cili politikës ia dha dimensionin më të çmueshëm të saj, dimensionin human. Historia jonë është histori e përkushtimit. T’i kujtojmë sot heronjtë tanë që lirinë e vendit e patën idealin më të çmuar jetësor. Sot kujtojmë trimërinë e komandantit Adem Jashari, secilin ushtar të UÇK-së, familjen Jashari, dëshmorët dhe heronjtë, të gjithë të pagjeturit, martirët e shumtë”, kishte thënë ndër të tjera Osmani.
Dy partitë opozitare nuk e përkrahën Osmanin
Partia Demokratike e Kosovës [PDK] dhe Aleanca për Ardhmërinë e Kosovës [AAK], nuk morën pjesë në seancën për zgjedhjen e presidentit, ndërsa LDK votoi për Osmanin.
Udhëheqësi i PDK-së, Enver Hoxhaj, para se partia e tij ta lëshojë seancën, kishte thënë se “kryeministri i Kosovës Albin Kurti po e emëron Vjosa Osmanin në pozitën e Presidentes për të pasur kontroll absolut mbi institucione të rëndësishme” duke shtuar se edhe Vjosa Osmani nuk është figurë unifikuese.
Ndërsa kryetari i AAK-së, Ramush Haradinaj, pati thënë se partia e tij është “kundër koncentrimit të pushtetit te një person apo parti politike, sepse kjo i bën dëm demokracisë në dobi të vendosjes së autoritarizmit.
Puna e Vjosa Osmanit si presidente
Vjosa Osmani si presidente e vendit ka zhvilluar takime e vizita me disa shtete e me liderë të sheteve të cilët ishin për vizitë në Kosovë. Shpeshherë, në vend të Osmanit reagoi burri i saj, Prindon Sadriu, i cili mediat i ka si cak për linçim.
Osmani thuhet se ka kursyer më shumë se presidentët e tjerë dhe ky fakt përsëritet shpesh nga zyrtarë të Zyrës së Presidentes.
Kujtojmë që Vjosa Osmani, është presidentja e dytë grua e zgjedhur në Kosovë, pas Atifete Jahjagës./Nacionale