Epilogu i hetimeve që kishin filluar që në muajin mars të këtij viti, derisa më 30 korrik rezultoi me arrestimin e 18 personave të dyshuar për kontrabandim me emigrantë dhe sekuestrimin e një sërë provash materiale që pritet të ndihmojnë në zbardhjen e rrethanave të rastit, për çka raportoi ekskluzivisht Gazeta Sinjali.
Ndaj tyre, tashmë Gjykata Themelore në Prishtinë ka marrë vendim për një muaj paraburgim.
Lajmin për Sinjalin e kanë konfirmuar disa nga avokatët e të akuzuarve.
Rasti ka të bëjë me një numër të madh të emigrantëve të kontrabanduar.
Që nga muaji mars e deri më sot, dyshohet se 700 shtetas të huaj kryesisht aziatikë, janë kontrabanduar nga kosovarët, të cilët ndihmonin ata që përmes rrugëve ilegale të kalojnë në shtetet perëndimore.
Burimet e Gazetës Sinjali bëjnë të ditur se emigrantët që nga Shqipëria në Kosovë hynin përmes rrugëve malore, fillimisht strehoheshin në shtëpitë e personave të dyshuar, e më pas nga Prizreni transportoheshin fshehtas në kalimin kufitar në Jarinjë, prej ku kalonin në territorin e Serbisë./Sinjali