Nuk janë të pakta rastet në Kosovë, kur viktima të dhunës në familje janë prindërit të cilët përjetojnë nga fëmijët e tyre dhunë psikike e fizike. Një rast i tillë i rëndë është raportuar të ketë ndodhur në rrugën ‘Bill Clinton’ në Prishtinë, ku një grua e ka denoncuar djalin e saj për dhunë në familje, raporton Gazeta Sinjali.
Burimet nga Prokuroria bëjnë të ditur se një 56-vjeçare, e cila është në hall me të birin ka vendosur ta raportojë rastin në Polici, ku e shqetësuar skajshmërisht ka rrëfyer për dhunën psikike nga i biri 34-vjeçar.
Sinjali mëson se nga deklarata e nënës është kuptuar se djali po i shkakton probleme që një kohë, por një eskalim i tillë siç ka ndodhur herën e fundit nuk ka ndodhur asnjëherë. Ai dyshohet se po i shkakton dhunë psikike dhe po e kërcënon me fjalë dhe për ta parandaluar të keqen, ajo është detyruar që të kërkojë ndihmë.
Si rezultat i këtij denoncimi, Policia është vënë në veprim dhe ka shoqëruar të dyshuarin në stacion policor, ku është intervistuar nga hetuesit për veprën me të cilën ngarkohet.
Ndaj tij, Prokurori i Shtetit ka urdhëruar ndalimin për 48 orë për veprën penale “Dhunë në familje”.