Ish-kryetari i Preshevës, Shqiprim Arifi, ka folur rreth asaj nëse e sheh idenë e shkëmbimit të territoreve në mes të Kosovës dhe Serbisë si zgjidhje finale mes Kosovës dhe Serbisë.
Sipas Airifit, shqiptarët në Luginën e Preshevës kanë shprehur një dëshirë të fortë për t’iu bashkuar Kosovës që nga referendumi i vitit 1992.
“Ne e kemi një referendum të 92-ës, ku 99 % është votuar për të pasur të drejtë vetëvendosje dhe të drejtë për bashkëngjitje me Republikën e Kosovës”, ka thënë Arifi.
Ai pohon se askush nuk mund ta anulojë një referendum të tillë dhe se çdo parti politike në Luginë funksionon mbi premisën e një referendumi të tillë.
Arifi më tej thotë se një situatë e tillë duhet vetëm të kontekstualizohet dhe se një gjë e tillë nuk ndodh pa përkrahjen ndërkombëtare.
Megjithatë, ai beson se para se çështja të kalojë në bashkësinë ndërkombëtare, liderët politikë të Kosovës duhet të pyeten nëse duan që Lugina e Preshevës t’i bashkohet vendit.
Arifi thekson se nuk ka parë ndonjë seriozitet nga ana e Kosovës për një dëshirë të tillë të shprehur nga shqiptarët e Luginës së Preshevës në 20 vitet e fundit.
“Para se të shkojmë tek ndërkombëtaret, duhet ta pyesim maspari Albinin, Hashimin, Kadrinë, Ramushin e të tjerë, a janë për këtë. Ne s’mund ta realizojmë fundi fundit, duhet pasur një vullnet të mirëpritjes. Dhe në këtë aspekt çfarë kam mundur të analizojë, 20 vitet e fundit s’ka pasur një seriozitet ndaj vendimit tonë për t’u bashkangjitur me Kosovën”, ka thënë Arifi për ATV./Nacionale