Merkatoja e Lazios mund të quhet e mbyllur. Sot, klubi kryeqytetas prezantoi Mateo Musacchion në një konferencë për shtyp, ku drejtori sportiv i bardhekaltërve, Igli Tare e bëri të qartë se nuk do të ketë lëvizje të tjera në ditët e fundit të janarit.
“Po prezantojmë blerjen e fundit të janarit. Musacchio është lojtar me shumë përvojë dhe e njeh mirë futbollin italian. Prej katër vitesh ka luajtur te Milani. Për situatën ku ndodhemi, është një goditje që na vlen shumë, e kemi menduar shumë mirë bashkë me trajnerin. Na duhej shumë një futbollist me këtë profil e që nuk ka nevojë për kohë për t’u përshtatur. I urojmë mirëseardhjen, jemi të lumtur”, ka theksuar Tare, transmeton Super Sport.
Ndërsa futbollisti argjentinas deklaroi:
“Për mua është një mundësi e shkëlqyer, jam i lumtur që i bashkohem Lazios. Fizikisht jam mirë, vij me një dëshirë të madhe dhe uri. Për mua është një mundësi e shkëlqyer, jam gati të jap më të mirën time.”/RTK