Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë Kundër Korrupsionit, të martën ka mbajtur mbledhjen e rregullt, të kryesuar nga Adnan Rrustemi, kryetar, në të cilën është miratuar në parim Projektligji nr.08/L-136 për ndryshimin dhe plotësimin e Ligjit 06/L-056 për Këshillin Prokurorial të Kosovës (KPK).
Ministrja e Drejtësisë, Albulena Haxhiu, në këtë mbledhje, e ka prezantuar dhe arsyetuar Projektligjin nr.08/L-136 për ndryshimin dhe plotësimin e Ligjit 06/L-056 për Këshillin Prokurorial të Kosovës.
Ajo, ka thënë se për ndryshimet dhe plotësimet e këtij ligji, është konsultuar dy herë Komisioni i Venecias, dhe se opinonet e tij janë marrë parasysh.
Haxhiu, ka bërë të ditur se KPK-ja është paraparë t’i ketë shtatë anëtarë, përzgjedhja e të cilëve do të bëhet në mënyrë transparente.
Po ashtu, ajo ka thënë se për këtë projektligj, janë konsultuar grupet e interesit dhe shoqëria civile.
Me këtë projektligj, Haxhiu ka thënë se është paraparë edhe diciplinimi i anëtarëve të KPK-së.
Më pas, anëtarët e këtij komsioni, kanë adresuar pyetje, në të cilat është përgjigjur ministrja Haxhiu.
Ndërkaq, pika për shqyrtimin në parim të Projektligjit nr. 08/L-132 për Ekzekutimin e Sanksioneve Penale, është tërhequr nga rendi i ditës së kësaj mbledhje.