Ministri i Punëve të Brendshme të Katarit, Sheikh Khalid bin Khalifa bin Abdulaziz Al-Thani, u tregua zemërgjerë kur ia bëri dhuratë një orë të markës së njohur “Rolex” ministrit të Brendshëm të Kosovës, Xhelal Sveçla.
Ky i fundit u tregua edhe më ‘zemërgjerë’ pasi dhuratën vendosi që t’ia lë shtetit. Kështu të paktën tentuan ta shesin zyrtarë dhe vartës të partisë në pushtet – Vetëvendosje pasi me ligj parashihet që dhuratat nuk mund të merren nga ministri.
Zëdhënësi i Vetëvendosjes, Arlind Manxhuka, e pa si ‘gjest të jashtëzakonshëm’ veprimin e Sveçlës për mos pranimin e orës që kushton prej 30 mijë euro.
“Gjest i jashtëzakonshëm i ministrit Xhelal Sveçla: Kryeministri i Katarit i dhuron Sveçlës ‘’Rolex’’ prej 30 mijë eurosh, ai nuk e merr për vete, ja dhuron shtetit”, shkroi Manxhuka në mbishkrimin e lajmit të shpërndarë nga një faqe e cila është hapur para ca ditëve.
Çka thotë Ligji?
Dhënia dhe pranimi i dhuratave si çdo gjë tjetër është e paraparë me ligjet në Kosovë.
Ligji Nr. 04/L-050 Për Deklarimin, Prejardhjen dhe Kontrollin e Pasurisë të Zyrtarëve të lartë publik dhe Deklarimin, Prejardhjen dhe Kontrollin e Dhuratave për të gjithë personat zyrtarë parasheh qartë se secili zyrtarë që pranon dhuratë duhet të lajmërojë eprorin e tij dhe Agjencinë.
Meqë vizita e Sveçlës ishte vizitë zyrtare atëherë i bie që edhe dhurata ka qenë zyrtare. E sipas ligjit, këto dhuratat janë dhurata protokollare.
“2. Dhuratat protokollare konsiderohen dhuratat e sjella nga përfaqësuesit e vendeve të huaja dhe të organizatave ndërkombëtare gjatë vizitave dhe rasteve të tjera dhe dhuratat e sjella në kushte të ngjashme.”, thuhet në pikën 2 të Neni 11.
Neni 11, “Pranimi i dhuratave” pika numër 6, thotë se zyrtarët duhet të informojnë më shkrim eprorin e tij për dhuratën.
“6. Personi zyrtar duhet ta informojë me shkrim eprorin e tij, nëse i është ofruar ose dhënë një dhuratë pa paralajmërim dhe në rrethana specifike. Në rast se personi zyrtar është drejtues institucioni, ai duhet ta informojë Agjencinë.”, thuhet në ligjin.
Ndërsa Neni 12 “Regjistrimi i dhuratave” i po këtij ligji thotë se të gjitha dhuratat duhet të regjistrohen në regjistrin për dhurata.
“Të gjitha dhuratat e pranuara dhe vlera e tyre përkatëse, si dhe emrat e personave që kanë dhënë dhuratën, duhet të regjistrohen në regjistrin e dhuratave nga personi zyrtar që përcaktohet nga Agjencia dhe që mbahen nga institucioni, në të cilin personi zyrtar ushtron detyrën.”, thuhet në Nenin 12, pika numër 2.
Ndërsa me Nenin 12 pika numër 3 parasheh se personi zyrtarë nëse do ta marrë për vete dhuratë duhen shkresa në Agjencinë Kundër Korrupsion.
“3. Me kërkesën e personit zyrtar që ka pranuar dhuratën, Agjencia me vendim mund të lejojë të merret dhurata nëse ekzistojnë arsye bindëse se dhurata i është dhënë për qëllime personale dhe nuk ndikon ose nuk duhet të ndikojë në kryerjen e detyrës zyrtare.”, thuhet në po të njejtin ligj.
E për këtë ‘gjest’ të Sveçlës pati shumë reagime në rrjetet sociale.
Ish-këshilltari i kryeministrit, Albin Kurti, Durim Berisha, e pati një mesazh për ‘militantët’, i cili ia shpejgoi atyre se ministri Sveçla me orën e dhuruar për shetin ka përmbushur obligim ligjor dhe nuk ka bërë ndonjë veprim të jashtëzakonshëm.
“Xhelal Sveçla nuk ia dhuroi shtetin oren, ai permbushi nje detyrim ligjor. Pra lajmi permban nje titull te rrejshem dhe nuk behet fjale per ndonje veper madhore. Eshte sikur me u bo lajm dalja ne pune ne orar te percaktuar.”, ka shkruar ai.
Edhe opinionistja, Kimete Berisha, është përfshirë në gjestin e ministrit të Brendshëm, Xhelal Sveçla i cili e refuzoi orën e markës së njohur ‘Rolex’.
Berisha ka thënë se sheiku po mendon për ministirin duke u tallur me refuzimin e dhuratës nga ana e tij.
“Akrepat një mbi një në Rolex. Sheiku po mendon për Ty!”, ka shkruar ajo.
Kujtojmë që ish-presidentja e Kosovës, Atifete Jahjaga, kishe refuzuar një orë dore.
Një orë që e mori dhuratë ministri i Punëve të Brendshme, Xhelal Sveçla, nga sheiku i Katarit, për të cilën flitet se kushton rreth 30 mijë euro, u bë lajm i ditës në Kosovë. Partia në të cilën bën pjësë Sveçla, u krenua se si ky i fundit bëri kinse, një gjest shumë solidar e human, duke ia “falur” shtetit dhuratën. Në fakt kjo që bëri Sveçla nuk ka asnjë ngjyrë heroike, është thjeshtë obligim ligjor.
E në përputhje me ligjin dhe ndoshta me disa nuanca “heroizmi” kishte vepruar ish Presidentja e vendit, Atifete Jahjaga. Ajo në një emision televiziv, pati treguar se si, në mënyrë zyrtare e kishte refuzuar një dhuratë (orë të shtrejtë) të cilën kishte tentuar të ia dhurojë, një ndër biznesmenët më me ndikim në Kosovë.
“Ka qenë një dhuratë e cila ka qenë me vlerë mijëra euro. Nëse nuk gaboj ka qenë dikur në javën e parë apo të dytë të mandatit tim. Ka qenë një orë dore me një vlerë enorme. Ka qenë nga një biznes i Kosovës. Unë me të parë vlerën e kësaj dhurate… Unë kam kërkuar që kjo dhuratë menjëherë të kthehet, ashtu si e sheh protokolli i shtetit është kthyer në mënyrë zyrtare dhe me shkresë zyrtare. Pati thënë Jahjaga. Në pyetjen gazetarës se a ka qenë ky biznes i ‘Devollëve’, ish-presidentja u pati përgjigjur shkurt: ‘Po’./Nacionale