115 mijë e 903 euro ka shpenzuar Ministria e Industrisë, Ndërmarrësisë dhe Tregtisë në ekspozitën ndërkombëtare “Expo 2020 Dubai” gjatë muajit shkurt 2022.
Nacionale përmes qasjes në dokumetet publike, ka siguruar të gjitha shpenzimet e kësaj ministrie për pjesëmarrjen e Kosovës në “Expo 2020 Dubai”.
Sipas faturave, del që “Opera SHPK” mori 40 mijë euro për koncertin që e mbajti atje ndërsa veç qiraja për piano kushtoi 3 mijë e 988 euro.
Në dokumentet e siguruara nga MINT, 40 mijë euro i janë dhënë “Opera SHPK” që pjesë e saj ishte edhe tenori Ramë Lahaj, 970 euro për foton promovuese të realizuar nga Ismet Sijarina, 587 për hartën promovuese nga Ajet Hyseni dhe 985 euro për Klodiana Brahën, e cila ka realizuar videon promovuese.
Ndërsa 3 mijë e 988 euro, i ka kushtuar buxhetit të MINT qiraja e pianos, të cilat ia ka paguar kompanisë Mei General Trading.
Në përgjigjen e MINT thuhet se shpenzimet e përveçme të ministres Rozeta Hajdari, ministrit Faton Peci dhe dy të tjerëve ia kanë mbuluar Emiratet e Bashkuara Arabe ndërsa për zyrtarët tjerë shpenzimet janë paguar nga ministria.
Krejt shpenzimet e të gjithë zyrtarëve që kanë marrë pjesë, akomodimi, biletat, ushqimi, pare xhepi, kanë kushtaru 14 mijë e 625 euro.
Leman Hatashi, zyrtare në MINT, ka harxhuar 191 euro për akomodim, 319 euro për ushqim dhe si para xhepi, ndërsa bileta i ka kushtuar 877 euro. Gjithsej, shpenzime Hatashi ka pasur rreth 1 mijë e 388 euro.
Zyrtari Zef Dedaj, ka harxhuar gjithsej 1 mijë e 455 euro për akomodim, ushqim, pare xhepi.
Zyrtarja Sara Mehmeti, e cila ka qëndruar më gjatë në këtë ekspozitë ka shpenzuar 1 mijë e 588 euro për akomodim, 981 euro për ushqim dhe si para xhepi, 205 euro për shpenzime të tjera dhe 761 euro për biletë. Gjithsej, ajo ka harxhuar 3 mijë e 537 euro.
Alpinistja Flutura Ibrahimi nga buxheti i MINT ka shpenzuar 260 euro për akomodim dhe 1 mijë e 153 euro për biletë, gjithsej 1 mijë e 414 euro.
Bashkë me MINT-in, në këtë ekspozitë kanë marrë pjesë edhe Meriton Braha, Ismet Sijarina, Bledi Malushi si kameramanë, Muea Ibrahimi nga Oda Ekonomike e Kosovës, Arbnora Dushi nga Akademia e Shkencës dhe Arben Llapashtica si fotograf.
Secili prej tyre kanë harxhuar nga 260 euro për akomodim dhe nga 877 euro për bileta.
MINT po ashtu, përveç krejt këtyre fatuarave, ka bërë të ditur se ka edhe fatura të tjera që do të procedohen nga buxheti i kësaj ministrie.
Në anë tjetër MINT ka thënë se 629 mijë euro janë planifikuar për pjesëmarrje dhe përfaqësim në këtë ekspozitë.
“Sa i përket buxhetit kombëtar për “Expo 2020”, janë buxhetuar: 75 mijë euro nga kursimet brenda buxhetit të MINT të vitit 2021 dhe 554 mijë euro për vitin 2022 të siguruara nga buxheti i përgjithshëm i Kosovës, të pozicionuara në kuadër të KIESA-s. Pra, gjithsej 629 mijë euro të planifikuara për pjesëmarrje dhe përfaqësim në këtë ekspozitë ndërkombëtare. Nga ky buxhet i planifikuar, MINT ka shpenzuar vetëm 115 mijë e 903 euro, janë kursyer 513 mijë e 96 euro nga buxheti i planifikuar”, kanë thënë nga MINT.
Kujtojmë që panairi botëror Expo 2020 Dubai është mbajtur nga 1 tetori 2021 deri me 31 mars 2022.
Në këtë panair kanë marrë pjesë rreth 190 pjesëmarrës dhe vizitorë të tjerë. Kosova u përfaqësua për herë të parë në këtë panair./Nacionale