Qeveria e Kosovës, me datë 4 korrik, mori vendim për t’iu paguar policat e sigurimeve bashkatdhetarëve tanë që do të zbarkojnë në vendlindjen e tyre përgjatë kësaj sezone dhe jo vetëm.
Megjithatë, duket se ky vendim ka prapaskenat e veta, që nuk po u pëlqejnë edhe aq mërgimtarëve.
Kjo për shkak, sipas vendimit, atyre do t’u duhet ta kryejnë pagesën prej 20 eurove, ndërkaq, më pas të drejtohen te zyret e sigurimit respektiv, për t’i tërhequr paratë.
Ky itinerar po shihet si maltretim për shumë prej mërgimtarëve. Madje, njëri syresh ka dhënë edhe arsyet pse kjo ide është e gabuar.
Sipas tij, për të siguruar paratë, një mërgimtari që i duhet të heqë dorë nga njëra ditë e pushimit, për të marrë rrugë në kryeqytet. Jo vetëm aq.
Tutje ai renditi disa nga arsyet pse kjo mënyrë e lirimit nga pagesa është e gabuar.
“Unë jam ardhur më 08.07.2022 në pikën kufitare në Merdarë, unë i thash sigurimi është pa para, ai tha jo duhet të paguani 20 euro zotëri, nesër ose pasnesër mund të shkoni në Prishtinë, në zyret e sigurimit t’i tërheqni paratë dhe i merrni 15 euro. Pse kryeministër gjithë këtë maltretim? Pse unë prej Ferizajt, dikush prej Pejës, ose dikush prej fundit të Kosovës të shkojnë në Prishtinë e t’i tërheqin 20 euro? Kjo është plaçkë! Sepse ju e dini, asnjë mërgimtar, ju e dini, asnjë mërgimtar nuk shkon në Prishtinë. Nën 1: E humb ditën e parë. 2. Kushton 15 euro ose 20 euro benzina ose nafta. 3. Parkingu 5 euro në Prishtinë. Çka?”, vazhdoi ai i frustruar.
Në fund fare ai i bëri thirrje kreut të ekzekutivit që t’i ndalojë këtë propaganda, duke shtuar se nëse është nevoja paguajnë edhe më shumë.
“Po kjo është një vjedhje e madhe që është duke iu bë mërgatës tonë. Z. Kryeministër, mos bëni kësi propaganda, boll më, boll, deri kur kështu? Më mirë thoni po, 20 euro, ne i ndihmojmë shtetit, edhe më shumë jo veç 20 euro, po me këto (vendos pagesën në kamerë) nuk shkohet kështu”, përfundoi ai.
Çka është polica kufitare, apo “Kartoni i Gjelbër”?
Kartoni i gjelbër vërteton se një automjet përfiton në mënyrë të mjaftueshme nga mbulimi i përgjegjësisë nga sigurimi. Kështu, kur makina përfshihet në një aksident në territorin e një shteti ku vlen sistemi i Kartonit të gjelbër, sigurimi mbulon koston (e lëndimit, dëmtimit, etj).
Në çdo shtet në të cilin aplikohet Kartoni i Gjelbër, d.m.th. në 45 shtete, ka një zyrë të sigurimit. Këto zyra janë të njohura dhe të grupuara në Këshillin e Zyrave (Byrove) (Cuncil of Bureaux, CoB). Vini re se shumica e shteteve anëtare janë evropiane.
Që të pranohen në CoB, zyrat kombëtare janë të detyruara t`i ndjekin kërkesat e CoB, përndryshe mbulimi i sigurimit për automjetet e siguruara nga ai vend nuk do të jetë i garantuar.
E njëjta gjë vlen edhe për automjetet e siguruara nga kompanitë e sigurimeve të shteteve të tjera; ato nuk janë të siguruara nëse vizitojnë vendin i cili nuk i përmbahet rregullave te CoB. Zyrat e sigurimit ose mund t`ua dërgojnë vetë mbajtësit të automjetit Kartonin e Gjelbër, ose të lejojnë kompanitë e sigurimeve që janë anëtare të CoB të lëshojnë (të japin) Kartonin.
Zyra (Byroja) Kombëtare Zvicerane e Sigurimeve, për shembull, ka zgjedhur variantin e dytë për këtë gjë, në mënyrë që pronarët e automjeteve të siguruara në kompanitë në Zvicër të marrin Kartonin e gjelbër nga kompanitë e tyre./Nacionale