Kryesia e Lidhjes Demokratike të Kosovës (LDK) sot mbajti mbledhjen e radhës me qëllim të përgatitjes sa më të mirë të Kuvendit për zgjedhjen e kryetarit të kësaj partie politike.
Në mbledhje u dakordua për përgatitjet e nevojshme dhe të domosdoshme për mbledhjen e Kuvendit dhe në parim u konfirmuan edhe emrat e delegatëve të Kuvendit, të cilët janë konfirmuar nga secila degë e LDK-së.
Në mbledhjen e sotme, u paraqitën edhe dy kandidatura për kryetar të LDK-së, Lutfi Haziri, nënkryetar i LDK-së dhe kryetar i Gjilanit, si dhe Lumir Abdixhiku, anëtar i Kryesisë së LDK-së.
Në mbledhje gjithashtu u shpreh se ka edhe kandidatura tjera, që mund paraqiten ditëve në vijim.
Isa Mustafa ka dhënë dorëheqje nga posti i kryetarit të LDK-së pas debaklit në zgjedhjet parlamentare të 14 shkurtit, në të cilat kjo parti mori rreth 13 për qind të votave, rezultati ky më i dobët ndonjëherë në historinë e kësaj partie.
Kuvendi zgjedhor i LDK-së do të mbahet më 14 mars dhe aty pritet të zgjidhet kryetari i ri i partisë./KosovaPress